Laudioko Mugimendu Feministak herriko festetako ekimenak aurkeztu ditu. “Batetik, eraso matxisten aurkako protokoloa jarriko dugu martxan, eta bestetik, abuztuaren 26an mobilizazioa egingo dugu”. Modu horretan nahi dituzte jaiak ere espazio seguru eta libreak izatea guztientzat.
Garaiak aldatu arren, indarkeria matxistak eta sexismoak presente darrai, euren ustez. “Beste urte batez, Mugimendu Feminista gisa, jai eremuan eragiteko ardura dugula pentsatzen dugu; antolatzeko beharra dago, oraindik ere eraso matxista asko gertatzen baitira”. Funtsean, aurre egiteko eta “erasotzaile guztiei hortzak erakusteko” bi ekimen horiek saretu dituzte abuztuaren 15etik 17ra, eta 24tik 28ra.
Duela urte batzuk moduan, 24 orduko telefonoa izango du abian Mugimendu Feministak, eraso matxistarik balego salatu eta erasoa jasan duen pertsonari babesa adierazteko. “Sare sozialetan zabalduko dugu zenbakia, baita kartelen bidez ere. Eta, horrez gain, jaietako esparru ezberdinetan egongo da ikusgarri telefono zenbakia”. Horretarako, tabernetan, herriko kaleetan zein txosnagunean kartelak edota komunikaziorako bitartekoak jarriko dituzte, aurreratu dutenez.
LAUDIOKO JAIETAN ERASO MATXISTEN AURKAKO PROTOKOLOA MARTXAN!
— Laudioko Mugimendu Feminista (@laudiokomf) August 9, 2022
24 orduz izango da eskura salaketa telefonoa,
Abuztuaren 15etik 17ra, eta 24tik 28ra.
Sareak josiz eta autodefentsa feministaz erantzungo diogu eraso orori#autodefentsaFeminista pic.twitter.com/fpyfxftnWv
Abuztuaren 26an, manifestazioa
Bestalde, Baserritar egunean urtero egin izan duten mobilizazioa mantenduko dute. “Helburua, gertatzen diren eta ikusten ari garen eraso matxisten olatuen aurrean, planto egitea da; eta antolatuta gaudela bistaratzea”. Zentzu horretan, mezu argia zabaldu dute: “Gertatzen dena gertatzen dela, aurre egiteko prest egongo gara. Ez dugu inolako erasorik onartuko”. Mobilizazio jendetsua aurreikusi dute ostiral horretan, “denok dugulako zer esana eta posizionatzeko ardura”. Beste urte batzuetan bezala, zapiekin bertaratzeko deia luzatu dute: “Jende guztia animatzen dugu zapi moreekin mobilizaziora gerturatzera, ekimena deigarriagoa eta koloretsuagoa izateko”.
Ildo beretik, manifestazio mistoa izango dela nabarmendu dute, “baina emakumeok* hartuko dugu lehen lerroa eta protagonismoa”. Hargatik, herritar eta inguruko bidelagun oro gonbidatu dute protestan parte hartzera. “Badakigu gaur egun ere beharrezkoa dela kalera ateratzea erasoak salatzera”, gehitu dute.
Jai giroko jarrera edo joera matxistez galdetuta, adibide ugari aipatu dituzte: espazioen okupazioa generoka, oholtzetako edota ekitaldietako protagonisten generoa, barraka edota tabernetako musiken mezu sexistak… “Oraindik ere, kaleak, jaiak… espazio guztiak gureak ere badirela aldarrikatzera atera behar gara. Argi izan: hor egongo gara eraso guztien aurrean antolakuntza feministarekin aurre egiteko”.
Asteak daramatzate prestaketa lanetan, jakinarazi dutenez. Eraso matxisten protokoloaren lantaldeko kideak saretzen, komunikazio bitartekoak sortzen… Aurrera egiteko garaia dela garbi dute: “Denok dugu erantzukizuna gertatzen den eraso oro salatu eta espazio seguruak guztion artean sortzeko. Gizonezko konplizeekin, emakumeak saretzearen bidez, antolatuz… Hori bermatzeko ahal den guztia egingo dugu Mugimendu Feministatik ere”.