EGITARAUEN ANALISIAK

Laudioko Jaietako kultur ekitaldien %76an gizonezkoak izango dira nagusi oholtzan

Amak izango da Laudioko jaietan joko duen emakumezkoen talde bakanetako bat. / Aiurri

Soilik emakumezkoak taularatutako emanaldiak %10 izango dira, Aiaraldea Komunikabideak eginiko zenbaketaren arabera. Udalak zein herriko elkarte eta eragileek antolatutako ekintzak hartu dira kontuan kontaketan. 

Genero desoreka handiak egongo dira Laudioko Jaietan, kultur ekitaldiei dagokionez. Ekitaldi horien ia erdian (%49) ez da emakumerik egongo oholtza gainean, emanaldia emango duten sortzaile guztiak gizonezkoak izango direlako. Saioen %27an, aldiz, gizon gehiago taularatuko dira emakumeak baino. 

Emanaldi guztien %24an soilik izango dute emakumeek nagusitasuna: %14an gizonak baino gehiago izango direlako oholtza gainean, eta beste %10ean, aldiz, taldekide guztiak emakumeak izango direlako. 

Grafiko honetan ikusi daitezke datuan xehetasun gehiagorekin:

Zenbaketa egiteko irizpideak

Aiaraldea Komunikabideak egin du azterketa. Zenbaketa errazteko, kultur ekitaldiak soilik hartu dira kontuan (kontzertuak, ikuskizunak, antzerki emanaldiak...). Hau da, albo batera utzi dira hizkuntza-irizpideen arabera sailkatzeko zailak diren zenbait jarduera (herri bazkariak, lehiaketak, ekitaldiak…). 

Era berean, Laudioko Udalak argitaratutako jai programa erabili da zenbaketa egiteko. Tokiko erakundeak eta herriko beste hainbat elkarte eta eragilek antolatutako jarduerak agertzen dira bertan, egingo diren ia guztiak, alegia. Dena den, zenbait jarduera (tabernek azken orduan iragarritako emanaldi batzuk kasu) ez dira kontuan hartu. Modu horretan, 49 ekitaldi aztertu dira guztira.

Parekidetasuna neurtzerako orduan, aldiz, lau multzo osatu dira. Lehen multzoan soilik gizonez osatutako talde eta emanaldiak sartu dira. Bigarren multzoan, gizonezkoak nagusi diren kasuak barnebildu dira (%50a edo gehiago gizonezkoa). Hirugarren multzoan, aldiz, emakumeak nagusi diren emanaldiak daude (%50a edo gehiago emakumezkoak). Laugarrenean, aldiz, soilik emakumez osatutako taldeak sartu dira. Aipatzekoa da azken multzoan 5 talde edo emanaldi baino ez direla topatu, soilik gizonezkoek osatutako taldeak 24 (ia bost aldiz gehiago) diren bitartean. Era berean, nabarmentzekoa da baita soilik bi kasutan dela emanaldiaren osaketa erabat parekidea (%50 gizon, %50 emakume).

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide