Abuztuaren 12an hasiko dira Amurrioko festak. Aiaraldea Komunikabideak jaietako ekintzen genero azterketa egin du. Guztira, 127 jarduera barne hartzen ditu 2022ko egitarau osoak, eta horietatik 48 izango dira (%37,80) kultur ikuskizunak.
Kultur ekintzen %67 gizonezkoek oso-osorik osatutako taldeek gauzatuko dituzte, emakumeak bete-betean (%100) protagonista diren emanaldiak %13 bakarrik diren bitartean
Genero arrakala nabarmena da: kontratatutako kultur ekintzen %67 gizonezkoek oso-osorik osatutako taldeek gauzatuko dituzte, emakumeak bete-betean (%100) protagonista diren emanaldiak %13 bakarrik diren bitartean. Zentzu horretan, ikuskizun mistoak (emakumezko zein gizonezkoek osaturiko taldeenak) %21 izango dira. Horietatik %4 izango dira guztiz parekideak (hots, emakumezko eta gizonezko kopuru bera dutenak), %4an emakumeak izango dira gehiengoa oholtzan, eta %13an gizonezkoak. Zenbakitara ekarrita, ondorengoa da Amurrioko kultur ekitaldietako genero azterketa:
Zenbaketa egiteko irizpideak
Aiaraldea Komunikabideak egin du azterketa. Zenbaketa errazteko, kultur ekitaldiak soilik hartu dira kontuan (kontzertuak, ikuskizunak, antzerki emanaldiak...). Hau da, albo batera utzi dira hizkuntza-irizpideen arabera sailkatzeko zailak diren zenbait jarduera (herri bazkariak, lehiaketak, ekitaldiak…).
Era berean, Amurrioko Jai Herrikoien aldeko Batzordeak eta Udalak argitaratutako programa erabili da zenbaketa egiteko. Tokiko erakundeak eta herriko beste hainbat elkarte eta eragilek antolatutako jarduerak agertzen dira bertan, egingo diren ia guztiak, alegia. Dena den, zenbait jarduera (tabernek azken orduan iragarritako emanaldi batzuk kasu) ez dira kontuan hartu. Modu horretan, 48 ekitaldi aztertu dira guztira.
Parekidetasuna neurtzerako orduan, aldiz, lau multzo osatu dira. Lehen multzoan soilik gizonez osatutako talde eta emanaldiak sartu dira. Bigarren multzoan, gizonezkoak nagusi diren kasuak barnebildu dira (%50 edo gehiago gizonezkoa). Hirugarren multzoan, berriz, emakumeak nagusi diren emanaldiak daude (%50 edo gehiago emakuzkoak direnak). Laugarrenean, ordea, soilik emakumez osatutako taldeak sartu dira.