Olatz Camino pozik dago bere buruan zituen kirol helburuak betetzen ari delako. Azken bi denboraldietan emaitza bikainak lortu eta gero, Eneicat - RBH Global talde profesionalera batuko da 2023an.
Eneritz Iturriaga kirolari profesional ohiak eta taldeko zuzendariak eskaini zion aukera hori ekainean bertan, eta duela hilabete bat baiezkoa eman zion laudioarrak. Taldeak duela hiru egun iragarri zuen Caminoren fitxaketa, eta azpimarratu du bere etengabeko lanaren jarraitzaileak direla.
Sub-23 mailan hasiko bada ere, Olatz Caminok azaldu du aukera izango duela nazioarteko lasterketa garrantzitsuenetan egoteko talde profesionalarekin
Eneicat - RBH Global lehiatzen da UCI Women´s Team kategorian, hau da, errepideko txapelketa nagusienetan. Caminok uste du lehen urtea izanik, bere eginkizuna dela ikastea eta hobetzea: "Gehiago entrenatu behar dut, lasterketa garrantzitsuenetan parte hartu nahi izanez gero".
Izan ere, kirolaria Sub-23 mailan hasiko da, baina espero du elitean lehiatzeko aukera izatea: "Esan didate, printzipioz, UCIko Pirinioetako edota Estatu frantseseko zenbait probatan egoteko atea irekiko didatela".
Orain Leon, 2023an Abadiño
2019an sortua, Eneicat - RBH Global taldea Leonen kokatuta dago. Ordea, 2023an Abadiñon finkatuko da, hangoa baita bere zuzendaria. Caminok goraipatu du berarekin lan egitea oso erraza dela eta gertutasunak horretan lagunduko duela. Laudioarrak nabarmendu du bere taldekideak ezagutzen dituela jadanik eta ondo moldatzen dela eurekin.
Azkenik, gazteak eskerrak eman dizkie gurasoei, euren laguntza gabe ezinezkoa litzateke profesional mailara heltzea eta.