Ostiralean tokiko ekoizleek 10 minutuko plantoa eta mobilizazioa egingo dute Baserritar Eguneko azoka dela medio. Horren harira, Laudioko Udalak adierazi du: "Laudioko Udalak baserritarren merkatura produktuak saltzera joaten diren pertsonei soilik exijitu die osasun- eta lan-arloan indarrean dagoen araudia betetzeko".
Horrez gain, tokiko erakundeak azpimarratu du indarrean sartu den araudia ez duela berak sortu, baizik eta beste instituzio goren batzuen irizpideak jarraiki ezarri duela: "Osasun Erregistroko inskripzioari dagokionez, saltzaile batzuentzat nahitaezko baldintza da, egiten duten jarduera motaren arabera, eta bakoitza da inskribatuta egon behar duen ala ez jakiteko arduraduna. Ez da Udalak ezarritako betekizuna, Europako eta Estatuko arauek ezarritakoa baizik".
Azkenik, Udalak argitu nahi izan du araudi berriaren eskutik ez dela debekatu produktuen eraldaketa: "oinarrietako batean ere ez da jasotzen produktuak ekoizlearen edo ekoizlearen jabetzakoak ez diren transformazio-zentroetara bidali ezin direnik, eta beste eragile batzuekiko interakzioa baimentzen da produkzio-katearen hainbat puntutan".