Gaur itxi dituzte Laudioko udako igerilekuak arazo tekniko baten ondorioz. Igandean agortuko zen udako jarduera, baina udal iturriek azaldu dute urak ez dituela beharrezko baldintzak betetzen, jario batengatik.
Hori dela eta, azpiegiturak itxi dituzte eta arazoa konpontzeari ekin diote. Udalak berak erantsi du udako abonua ordaindu zutenek badutela parada kiroldegiko igerilekuetara joateko irailaren 11ra arte.
Langileen salaketak
Azpiegituretako zenbait langile Aiaraldea Komunikabidearekin harremanetan jarri dira ez daudelako erabakiarekin ados. Alde batetik, euren ustez, igerileku bakarra dago kaltetuta eta besteak irekirik mantentzeko aukera zegoen.
Horrez gain, beharginek aipatu dute uraren kloro eta PH neurketak ez zirela guztiz egokiak duela ia hilabete bat, baina ez dela ezer egin orain arte, neurketak guztiz deskontrolatu direnean. Zehazki, nabarmendu dute kloroa punpatzeko sistemak ez duela ondo funtzionatzen.
Azkenik, langileek adierazi dute irailaren 11ra arteko kontratuak zituztela eta gaur eten dizkietela, hau da, lau egun horiek ez dizkiete ordainduko.