Uda ate joka dago, eta abiatzear da eskualdeko igerilekuen denboraldia. Aiaraldean, orotara, 7 piszina daude uda garaian zabalik, ondorengo datetatik aurrera:
- Etxaurreneko igerilekuak (Ibaguen, Aiara): ekainaren 18tik irailaren 11ra (ikusi prezioak hemen).
- Artziniegako udako igerilekuak: Arazoak sortu dira azpiegituretan eta, ondorioz, irekiera data atzeratu dute. Artziniegako Udalak eman ditu horri buruzko azalpenak sare sozialetan.
- Okondoko udako igerilekuak: ekainak 17 irailaren 11ra (ikusi prezioak hemen).
- Urduñako igerilekuak: ekainaren 17tik aurrera (ikusi prezioak hemen).
- Laudioko udako igerilekuak: ekainaren 19tik irailaren 11ra (ikusi oharra hemen).
- Amurrioko udako igerilekuak: ekainaren 15etik irailaren 18ra (ikusi oharra hemen).
- Orozkoko udako igerilekuak: ekainaren 15etik irailaren 14ra (ikusi oharra hemen).
Gaur zabalduko dituzte ateak azpiegitura gehienek. Gainera, Okondon, apar festa antolatu dute irekiera ospatzeko.
Bestalde, Amurrioko Udalak azaldu duenez, ekainaren 27tik 29ra itxita egongo dira azpiegiturak, Esti Urresolaren filmaren grabaketa egiteko.
Prezioak
Azpiegitura gehienek dituzte igerilekuez gain edari edota janaria erosteko postuak, baita taberna zerbitzua ere. Sarreren prezioak, berriz, ondorengoak izango dira tokian toki (bazkideak ez direnentzat):
- Etxaurreneko igerilekuak (Ibaguen, Aiara): Helduak 4€ eta ume zein gazteek (17 urte arte) 2,70€. Edadetuek, berriz, 1,50€ ordaindu beharko dituzte (65 urtetik gorakoek, alegia).
- Okondoko udako igerilekuak: Astean zehar 1.25€ haurrek, 2€ gazteek (13-17 urte), 3€ helduek (18-64 urte) eta 1.25€ edadetuek (65 urtetik gorakoek). Asteburu eta jai egunetan 1.75€, 2.50€, 4.50€ eta 1.75€ ordaindu beharko dituzte, hurrenez hurren.
- Urduñako igerilekuak: Astean zehar 4-17 urte artekoek zein 65 urtetik gorakoek 2€, eta helduek 3.5€. Asteburuetan, aldiz, euro bat garestiago izango dira sarrera guztiak (3€ eta 4.5€ ordaindu beharko dituzte, hurrenez hurren)
- Laudioko udako igerilekuak: Astean zehar 1.10€ haurrek eta 3.25€ helduek, eta jai egunetan 1.70€ eta 4.30€ balioko dute sarrerek (Ez erroldatuek %25 gehiago ordaindu beharko dute).
- Amurrioko udako igerilekuak: Lanegunetan 65 urtetik gorakoek eta aniztasun funtzionala dutenek 1€, haurrek 2€, gazteek 2.5€ eta helduek 3.5€. Asteburuetan, aldiz, 2.5€, 3€, 4€ eta 6€ ordaindu beharko dituzte sarreragatik, hurrenez hurren.