Indartsu abiatu dute Superberriakeko kideek greba mugagabea. Supermerkatu kateko denda batek ere ez du pertsiona igo gaur, ez baita langilerik joan lanera. Eguerdian dozenaka lagun bildu dira beharginek Bilboko Alde Zaharreko dendaren aurrean eginiko elkarretaratzean. Arratsaldean, aldiz, 500 herritar baino gehiago batu dira Laudioko supermerkatutik abiatu den mobilizazioan.
"Grebaren jarraipena %100ekoa izan da", nabarmendu dute langileek Herriko plazan eginiko hitzartzean. Orain arte esandakoa errepikatu dute grebalariek: zuzendaritzak ezarri nahi duen Enplegua Erregulatzeko Espedienteak ez duela inolako zentzurik, eta ez dagoela horrelako neurririk justifikatzen duen arrazoi ekonomikorik.
Gauzak hala, salatu dute Superberriakeko zuzendaritza dela egoeraren erantzule zuzena, eta nabarmendu dute enpresaren jabeak herrikoak direla, eta eurak direla "70 familia kalean uztearen" errudunak.
Bukatzeko, langileek eskerrak eman nahi izan dizkiete mobilizazioa igaro bitartean pertsiana jaitsi duten saltokiei. Era berean, beste enpresetako langileak edota saltokietako bezeroak izan dituzte gogoan, "bidalitako indar eta animoengatik".
Bihar Amurrion
Bihar Amurrioko dendaren parean egingo dute elkarretaratzea, 12:30ean. Datorren, aldiz, "herriz herri" mobilizatzeari ekingo diote, "astelehenean Ugaotik hasita".
Argazkiak: Aitor Burgoa eta Txabi Alvarado