Abuztuaren 27an, sanrokeetan, senidetu ziren Laudio eta Aldeaquemada udalerriek. Izan ere, herri andaluziar horretan hainbat laudioarrek dute jatorria.
Gauzak horrela, Laudioko Udalak eta tokiko Andaluziar Etxeak Aldeaquemadako ordezkariei bisita itzuli zieten asteburuan. Ostiralean, 10:00etan, Aiaraldetik atera eta Andaluziako bidea hartu zuten.
Hara heltzean, hainbat jende zuten zain, San Miguel Jaiak baitira herrian. "Herri osoa zegoen gure zain eta izugarri kezkatu dira, gu gustura egoteko", adierazi du Loli Solís Andaluziar Etxeko presidenteak. Ostiral horretan bigantxak ikusi eta berbenan parte hartu zuten, "guztiok dantzatu genuen", gogoratu du Solísek.
Larunbatean izan zen senidetzearen ekitaldi ofiziala udaletxean eta Laudioko ordezkari politikoek ez ezik, Andaluziar Etxeko presidenteak ere parte hartu zuen. Gero luntxa egin zuten eta arratsaldean herriko inguruak ezagutzen ibili ziren. "Inguruko mendiak eta amildegiak izugarri politak dira. Gainera, orro garaia da eta oreinak entzuten ziren" aipatu du Solisek.
Gauean jaiarekin jarraitu zuten eta igandean Kultura Jaialdia izan zuten. Laudioko Jaleo dantza taldeak, Aldeaquemadako jota taldeak eta flamenko talde batek alaitu zuten giroa eta bukatu bezain pronto autobusa hartu zuten laudioarrek, "ia bazkaldu gabe", Aiaraldea Komunikabideari adierazi diotenez.
Loli Solisek oso positiboki baloratu du egonaldia: "Erakundeen eta politikarien gaietan sartu gabe, hori beste kontu bat delako, nik primeran baloratzen dut herri guztia egon zela gure zain. Jende apalak bere herria eta ohiturak erakutsi zizkigun eta senidetzea amaiatu bada ere, pertsonalki uste dut itzuliko garela, oso leku polita baita eta oso gustura egon gara. Helburua bete dugu, herritarrekin egotea".
Argazkiak: Andaluzia Etxea