Gaur Aiaraldeko hainbat txokotan ospatuko da Arimen Gaua. Aretan, aldiz, asteburu hasieran egin zuten jaia. "Ostiralean egitea erabaki genuen zubia delako eta familia asko kanpora joaten direlako”, azaldu dute antolatzaileek. Erabaki ona izan zela dirudi, “arrakasta itzela” izan baitzuen ekimenak.
Kultur Etxean egin zituzten jarduera guztiak. Hainbat tailer burutu zituzten: “familiei eskatu genien komuneko papera eramateko, eta saguzarrak egin genituen horrela. Otarte dendak, aldiz, mamuen gozokiak eman zizkigun”. Kartoizko edalontziak apaintzeko tailerra ere egin zuten, eta gozokiak sartu zituzten gero. “Familiei eskatu genien gozokiak eramatea, dohaintza moduan, eta kriston gozoki pila lortu genuen”. Horrez gain, nabarmendu dutenez, eguneko apaingarri guztiak ama batek egin zituen, eskuz.
Horrez gain, antolatzaileek oso positiboki baloratu dute Kultur Etxea “berriz bizirik” egotea. Tailerrez gain, joko ugari ere egin zituzten kalean, sokatira edota zapi lasterketa, kasu.
Ekimen “erabat autogestionatua”
Aretako guraso batzuen artean antolatu zuten jarduera. Talde hori duela urtebete sortu zen, eskolatik kanpo ekintzak antolatzeko helburuarekin. Nabarmendu dutenez, ez dute inolako diru-laguntzarik. Gauzak hala, “ekimen erabat autogestionatua” izan zen ostiralekoa.
Kultur Etxeko barra ireki zuten, eta familiek prestatutako tortillak jarri zituzten salgai, 30 guztira. Bertan bildutako dirua baliatuko dute taldearen hurrengo jarduerak finantzatzeko. Aurreratu dutenez, Gabonetan eta Aratusteetan antolatuko dituzte hurrengo ekimenak.
Argazkiak: Aretako guraso taldea