Asteburu bizia izan dute Eneko Banderas motor gidariak eta bere taldeak Aragoin. Izan ere, XZ Cup lehiaketako txapelduna izatea lortu zuen laudioarrak, baina horretarako lasterketa ia perfektoa egin behar izan zuen igandean.
Berez, Banderas sailkapeneko bigarrena sailkatu gisa heldu zen Alcañizera eta erronka handia zuen aurretik. Igandean irabazi behar zuen lasterketa eta gainera, bira azkarrena bete, horrek bi puntu gehiago emango baitzizkion. Sari gehigarri horrekin, laudioarrak berdinduko zuen lehen sailkatuarekin, baina lasterketa gehiago irabazi izanagatik, txapelduna izango zen.
Larunbat gazi-gozoa
Helburu hori buruan izanda, larunbatean krono proba egin zuen eta bira azkarrena burutu zuen Banderasek, bere aurreikuspen guztiak gaindituta, minutu bat eta 59 segundoko marka ezarri zuen. Poztasunak, ordea, ez zuen gehiagi iraun. Arratsaldeko lasterketan matxura izan zuen motorrean eta bigarren biran proba utzi behar izan zuen.
"Une horretan pentsatu nuen txapeldun izateko aukera guztiei agur esango niela, ez genekielako matxura oso larria zen edo ez. Dena den, motorra arakatu eta analizatu ondoren, konpondu zidaten gauean eta igandean lasterketako irteeran egon nintzen", azaldu du gidariak.
Eta parte hartzea hobezina izan zen. Alde batetik, urteko irteerarik onena egin zuen eta, proba irabazi ez ezik, bira azkarrena ere berea izan zen. Horri guztiari esker, Espainiako estatuko XZ Cupeko txapelduna izan zen.
Banderasek esker hitzak izan ditu berarekin lasterketetara joan diren bi lagunentzat, Ricky Hernandez eta Andoni Virtus: "Lan pilo egin dute mekanikan eta beste arlo askotan. Doako lana, gainera".
Hurrengo denboraldiari begira, erabateko motibazioa dauka laudioarrak, eta jadanik hasi da babesleen bila, kalitate jauzia egiteko berriro.