Gaur atera da albistea. Arabako Foru Aldundiak Kexaako monumento multzoa erosteko prozedura abiatu du. Dominiken kongregazioa da eraikinaren jabea, eta 2,7 milioi euroren truke salduko dio erakunde publikoari 90.000 metro karratuko eraikin multzoa.
Gentza Alamillok gaur bertan jaso du informazioa Ramiro Gonzalez Ahaldun Nagusiaren eskutik. Aiarako alkatearen aburuz, “legealdiko albisterik onena” izan da. Alamillok balioan jarri du eraikin guztia erakunde publiko baten eskuetan egotea, eta nabarmendu du hori dela hasieratik bilatu dutena.
Gobernuburuak gogoratu du jabeek legealdi hasieran jarri zutela eraikina salmentan, baina euren asmoa prezio onena eskaintzen zuenari ematea zela. Gauzak hala, Alamillok positiboki baloratu du eraikina azkenean esku publikoetan amaitzea.
Alkateak Aiaraldea Komunikabideari adierazi dionez, momentuz ez dago monumento-multzoaren erabilerarako plan zehatzik, baina aurreratu du espazioa bisitatzeko aukera egongo dela berriz, ordutegi finko baten baitan.
Balio handiko ondarea
Hainbat eraikinek osatzen dute Kexaako monumento multzoa, eta balio handiko ondarea du. Alde batetik, jauregia dago, Aiaratarren leinu-etxea izan zena. Berari lotuta daude beste hiru eraikinak: San Joan Bataiatzailearen komentua, Adatseko Andre Mariaren elizaren kapera eta dorrea eta San Joan Bataiatzailearen eliza.
