Laudioko Hiri Antolamendurako Plan Orokorra berrikusteko lehen urratsa egin zuen udalbatzak astelehenean. Gaur egun indarrean dagoena 1993an osatu zen eta bi urte beranduago sartu zen indarrean eta eguneratzeko hainbat saiakera egin dira azken 29 urteetan.
Gauzak horrela, udal gobernu taldearen botoekin onartu zen egitasmo bikoitza. Alde batetik, HAPOren berrikuspenaren hasierako onarpena egin zen. Bestetik, abian jarriko den parte hartzerako prozesua zehaztu zen, herritarren iritziak jasotzeko.
Mahai gainean uzteko eskaera
Omnia talde independenteak abstentzioaren bidea hartu zuen bozketan, baina EH Bilduk kontrako botoa eman zuen. HAPOren berrikuspena garrantzitsutzat jo bazuten ere, parte hartze prozesuarekin ez zuten bat egin eta horregatik eskatu zuten puntu hori mahai gainean uztea. Proposamenak ez zuen aurrera egin, baina koalizioak azaldu zuen, besteak beste, "parte hartzerako prozesuaren komunikazio kanpaina indartsuagoa eta errazagoa izan behar dela, jendeak erantzun dezan eta bere interesa pizteko".
Horrez gain, Lamia Arcas zinegotziak kritikatu zuen herritarren ekarpenak jasotzeko mekanismoa ahalbidetu behar dela, proposamen itxi baten gainean egin behar baitituzte ekarpenak eta batzuk planteamendu horretatik atera daitezke. Halaber, onartzen ez diren iradokizunei ere erantzun behar zaiela azpimarratu zuten eta nabarmendu zuten HAPOren inguruan azken 29 urteetan sortutako dokumentazioa ere gehitu behar dela berrikuspenean.
Kontratazioa
Prozesuaren gidaritza eta HAPOren erredakzioa jadanik esleitu zituen Udalak abuztuan, 350.000 euroko kontratua eginda.