Gorka FC laudioarraren musika taldeak, Mental Issues bandak, badauzka bere lehen bi abestiak -Desparrame eta Freedom- disko batean, A fistful of Bad Habits bilduman, hain zuzen. Zehazki, kantak K7an jaso dituzte. "Formatu hori oso bogan jarri da Londreseko punk taldeen artean", aipatu du bateria-jotzaileak.
Bilduma horretan parte hartzeko aukera Cambridgen eskainitako kontzertu baten ostean suertatu zitzaien. "Overload taldearekin jo genuen eta disketxearen bi kidek eramaten dute musika zigilua. Proposatu ziguten eta baiezkoa eman genuen", argitu du Gorkak.
Berez, bilduman bi abesti dituen talde bakarra da Mental Issues, apropos ez bada ere. "Printzipioz, abesti bakarra sartu behar genuen, baina oso motzak direnez, bi bidali genituen. Gero, Teok -disketxearen arduradunak- esan zigun bakarra izan behar zela eta bat hautatu genuen. Horren ostean, Teok aipatu zigun guk aukeratutakoaren ordez, nahiago zuela bestea, hobeto entzuten baitzen. Guri pasa zitzaigun erantzutea eta biak jaso ditu. Dena den, oso motzak direnez, beste askoren abestiak, bakarra izan arren, gureak baino luzeagoak dira", azaldu du Gorkak.
Laudioarra pozik dago emaitzarekin. "Talde oso onak daude. Egia esanda, gu gara okerrenak, baina hori bagenekien aurretik", adierazi du barrezka.
Etorkizuna
Mental Issues taldeak abesti berriak grabatzeko asmoa dauka eta laster, otsailaren 25ean, beste bi kontzertu izango dituzte. Horren ostean, apirilaren 29an beste zuzeneko emanaldi bat izango dute eta uztailerako euren lagun baten omenezko kontzertua prestatzen ari dira.