Egun osoko greba egingo dute bihar (otsailak 22) Envases enpresako langileek, lan hitzarmena dela eta.
Goizetik gauera arte luzatuko da mobilizazioa: piketea egingo dute Ugarte auzoko lantegiaren sarreran 5:00etatik 10:00etara. Eguerdian, aldiz, elkarretaratzea egingo dute toki berean, 13:00etatik 14:00etara, eta 21:00etatik 23:00etara piketea osatuko dute berriz.
LABek osatzen du Envaseseko Enpresa Batzordea. Sindikatuak azaldu duenez, urtarrilean ekin zioten hitzarmen berria negoziatzeari. "Hiru bileraren ostean, enpresak proposamen bat aurkeztu zuen, zeinetan aurreko hitzarmenetik irabazitako eskubide asko kentzen eta aldatzen ziren. Ez zituen gure gutxieneko eskearak onartzen”.
Gauzak hala, Enpresa Batzordearen aburuz, negoziazioak seriotasuna galdu zuen.
Langile batzarra deitu zuten orduan, eta lanuzteei ekitea adostu zuten bertan. Orduan, zuzendaritzak jarrera aldatu zuen, LABen aburuz: “bilerak eskatzen hasi ziren, presa sartu zitzaien”.
Horrela, azken asteetan hainbat aldiz bildu dira bi aldeak. “Egon dira aurrerapausoak, baina zuzendaritzak ez ditu oraindik langileek eskatutako gutxieneko baldintzak onartu”.
Gaur goizean izan dute bilera, eta bertan ere ez dute adostasunik lortu, sindikatuak nabarmendu duenez. Horregatik erabaki dute biharko deialdia mantentzea, enpresak jarrera aldatu arte.
Lan hitzarmena eztabaidagaia izan da Envasesen azken urteetan. Langileek hainbat mobilizazio eta lanuzte egin zituzten 2020an, lan baldintzak hobetzeko: