Esti Urresola Sologuren zinemagilearen Cuerdas filmaren horma-irudiak hartu du Josu Pikaza Laudio Institutuko ikaslearen lekukoa, KulturLabek Zumalakarregi etorbidean atondutako espazioan. Laudioar sortzaileen erakusleiho izateko helburuarekin, hainbat dira azken hilabeteetan espazio horretan euren lanak aurkeztu dituzten herriko artistak. Diziplina artistiko horien artean zinema egotea "ezinbestekotzat" zuten KulturLabeko kideek.
Urresolaren lana goraipatuz
Cuerdas film laburraren horma-irudiarekin zuzendari laudioarraren ibilbidea balioan jarri nahi izan dute. Muskizen eta Laudion filmatu zuten Cuerdas, eta hainbat sari irabazi ditu: Canneseeko 61. Zinemaldiko Kritikaren Astean Rails d ‘Or sari eskuratu zuen, baita Film Labur onenaren Forque saria ere bai. Goya sarietarako hautagaia ere izan zen iragan hilabetean. Film labur onenaren saria irabazteko atarian geratu zen.
Horma-irudiak Urresolaren film laburra du hizpide, baian KulturLabeko kideek oso presente izan dute zinemagile laudioarraren azken lana: 20.000 especies de abejas. Berlinaleko sail ofizialean estreinatu zuten duela gutxi, eta honezkero historia egin du filmak. Izan ere, Sofia Otero pelikulako aktoreak Emakumezko Interpretazio Onenaren Zilarrezko Hartza irabazi zuen bertan.
KulturLaben espazio berria
Zumalakarregi etorbideko "bigarren azala" horma-irudia ez da KulturLabeko kideek esku artean duten proiektu bakarra. Datozen asteetan 2023ko ekimen garrantzitsu baten berri emango duela iragarri dute. Aurreratu dutenez kultur lokal txiki eta egonkor bat irekiko dute aurki Laudioko zentroan. Azaldu dutenez espazio berri hori Kultur Etxera eramango dute gero, bertako birgaitze-lanak amaitzen direnean.