Kirol elektronikoek zelairatu ziren atzo Laudioko Granja Kiroldegiko kantxan. Egun osoko topaketa antolatu zuen Bilboko Bisons Eclub taldeak, Udalarekin elkarlanean. Hainbat jardueraz gozatu ahal izan zuten bertaratutakoek. Alde batetik, FIFA txapelketan parte hartu ahal izan zuten. Norgehiagoka arratsaldera arte luzatu zen, eta egunaren amaieran jakinarazi zuten zeintzuk lortu zuten puntuazio altuena. 3D inprimigailuak erabiltzeko aukera ere egon zen, eta haur zein heldu ugari bertaratu ziren tresna horien funtzionamendua gertutik ezagutzera.
Horrez gain, lau hitzaldi eskaini zituen Bisons Eclub taldeak. Uxue Tomek eskaini zuen azken solasaldia. Gazte laudioarrak kirol elektronikoen sektorean dauden lan aukerak izan zituen mintzagai, eta nabarmendu zuen profil askotako pertsonak aritzen direla clubetan lanean, ez soilik bideo-jokalariak. "Nik, adibidez, publizitatea eta harreman publikoak ikasi nituen, eta diseinuaren alorrean aritzen naiz Bisons Eclub taldean", azaldu zien bertaratutakoei.
Egunaren amaieran, Tomek positiboki baloratu zuen topaketak izandako harrera, egun osoan zehar ehundik gora pertsona bertaratu zirela nabarmenduta.
