‘Arroz urez’ saiakera aurkeztera eta Faktoria ezagutzera joango da ostiralean Mikel Antza

Jone Gartzia Gerra 2023ko mai. 8a, 11:30
Deskargatu Info Ahotsak :

Hainbat aurkezpen egin ditu Mikel Antzak liburua argitaratu zuenetik. Irudian, 2021eko martxoan Iruñeko Karrikiri Elkartean egindakoa. / @Karrikiri

Bizipen pertsonalak josiz euskal gatazkaren inguruan egindako kontaketa bat da Arroz urez (Txalaparta, 2021). Mikel Antza idazleak maiatzaren 12an aurkeztuko du Faktorian. Hainbat gairen inguruan jardungo dira jendearen kezkei eta galderei egokitutako ordubeteko saioan.

Helburu bikoitza izango du Mikel Albisu Iriarte ‘Mikel Antza’ idazle eta antzerkigileak maiatzaren 12an Faktoriara egingo duen bisitak. Alde batetik, 2021ean argitaratu zuen Arroz urez saiakera aurkeztuko du lagun batek egingo dizkion galderetatik abiatuta. Euskadi Ta Askatasuna erakundearen sorreraren eta amaieraren inguruko kontakizuna jasotzen du saiakerak, idazlearen bizipen eta esperientzia pertsonalek josia. “Liburuak talaia pertsonaletik gure iragan hurbilari eta gaurko egoerari botatzen dio begirada”, azaldu du Antzak. Aurkezpenean horren inguruko iritziak, kezkak eta galderak jasoko dituzte, eta ordubeteko saioan hainbat gairen inguruan hitz egiteko aukera izango dute bertaratzen direnek.

Beste xede bat ere badu Antzaren eta bere kidearen bisitak. Izan ere, Faktoria ezagutzeko baliatu nahi dute bidaia. Kultur proiektu bat sortu nahian daude eta Aiaraldeko esperientziaren berri izan nahi dute horretarako.

Arroz urez saiakeraren aurkezpenari dagokionez, “lekuari egokitutako giro berezia” sortzea espero du idazleak. Parte hartzaileek liburua irakurri duten ala ez izango dute kontuan formatua moldatzeko, eta jendearen kezken eta galderen arabera jardungo dira. Arroz urez gogoetarako aitzakia izan daitekeela uste du idazleak: “Liburuak aukera ematen die garai hori bizi zutenei oroitzapenetarako eta orduan non zeuden kokatzeko, zer sentimendu zituzten, zer pentsamendu... Bizi ez zutenei, aurkezpen batean kide batek esan zidan bezala, ateak irekitzeko balio die: garai horri begiratzeko, galderak egiteko, edo bestelako ikerketak egiteko”.

Liburua eskuratu nahi duenak aukera izango du horretarako Faktorian bertan, espazioaren ohiko ordutegian, solasaldiaren egunera arte. Solasaldian parte hartzeko ez da aurrez izena eman beharko. Maiatzaren 12an izango da aurkezpena, 19:30ean.

Kultura Laudio

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide