Gizaker enpresak EITB taldeari inkesta berria egin zion apirilaren 26a eta maiatzaren 12a bitartean, maiatzaren 28ko hauteskundeen bozketa asmoari buruz galdetzeko. Ikerketaren emaitzei dagokienez, martxoan egindakoarekin alderatuta, aldaketak gertatu dira. Ez dira oso handiak, baina bai nahikoak egoera berria islatzeko.
PSE-EEk zinegotzi bat gutxiagorekin geratuko balitz, bestelako gehiengoak sortzeko aukera egongo lirateke udal gobernu taldea osatzeko
Izan ere, EAJk gora egingo luke apur bat bozken kopuruan (33,2tik 33,9ra), baina baita EH Bilduk ere (27,8tik 31,3ra). Horri gehitu beharko litzaioke Omniak bere hiru zinegotziei helduko liekela eta PSE-EE, aldiz, ordezkari bakarrarekin geratuko litzatekela, bat galduta. Zinegotzi galera horrek ezinezkoa egingo luke indarrean dagoen udal gobernu taldea sortzea jeltzaleen eta sozialisten artean.
Udal gobernu talde ezberdina osatzeko aukera
Egungo udal gobernu taldeak EAJk eta PSE-EEk osatzen badute ere, EITB Focus ikerketaren arabera, zinegotzi horiek ez lirateke nahikoa gehiengo osoa izateko. Hau da, zortzi zinegotzi batuko lituzkete, bederatzi izan ordez.
Ainize Gastaka EH Bilduko alkategaia: "Herritarren parte hartze eredua errespetatuko duen indar politikoekin akordioak lortzeko prest gaude"
Horrek gehiengo ezberdinak egituratzeko atea irekiko luke. EITBk azpimarratu du EH Bilduk eta Omniak izango luketela giltza, baina ez Ainize Gastakak ez Alvaro Barriosek ez dute horrelakorik berretsi Aiaraldea Komunikabidearekin hitz egin dutenean.
Gehiengo berriak? EH Bilduren iritzia
Izan ere, Ainize Gastakak adierazi dio Aiaraldea Komunikabideari EH Bildurentzat gakoa ez direla izango zinegotzien matematikak, parte hartze eredua baizik: "Guk proposatzen dugun herritarren parte hartze eredua errespetatuko duten indar politikoekin akordioak lortzeko prest gaude, baina horrek esan nahi du edozein alderdi izan daitekela, baldintza betetzen badu".
Omnia oso kritiko inkestarekin
Alvaro Barrios Omniako alkategaiak, edozein adierazpen egin baino lehen etorkizuneko balizko gehiengoei buruz, modu oso kritikoan mintzatu da Gizaker enpresako inkestari buruz: "Guretzat argi dago helburu politikoa duela inkestak eta nola aurkeztu dituzten emaitzak. Hain zuzen, uste dugu EAJ eta PSE-EEren jokaldia dela, zehazki, mamuak astintzeko eta botoa mobilizatzeko euren alde, adierazita euren botoa erabilgarria dela".
Alvaro Barrios Omniaren alkategaia: "Ez dugu ulertzen zergatik jartzen duten mahai gainean EH Bildurekin udal gobernu taldea sortzea. EAJrekin ere egin dezakegu"
Ildo horretatik, Barriosek ikerketaren metodologia kritikatu du: "Elkarrekin Podemosi buruz galdetu dute botoa ematerako orduan, jakinda koalizio horrek ez duela zerrendarik Laudion. Bere emaitzak %4,7 direla aintzat hartuta eta akats tartea %4,9 izanik, ez zaigu iruditzen serioa denik egin dutena".
Gehiengo berriei buruz galdetuta, Omniako zerrendaburua berriro kritiko izan da EITBrekin: "Ez dugu ulertzen zergatik jartzen duten mahai gainean EH Bildurekin udal gobernu taldea sortzea. EAJrekin ere egin dezakegu. Ordezkari kopuruak aukera ematen badu, guk defendatzen ditugun politiketan eragiteko baliatuko ditugu gure botoak. Berez, ez dugu uste udal hauteskundeetan boto erabilgarriaren mezua guztiz egokia denik, gehiengoak sortzeko gaitasuna da erabakigarria eta ez horrenbeste boto kopurua".
Ander Añibarrok maiatzaren 28a dauka buruan
EITB Focusen emaitzei buruz galdetuta, Ander Añibarro EAJko alkateak ez dio berebiziko garrantzirik eman: "Joerak neurtzeko balio dute, baina ez diot gehiago erreparatu".
Ander Añibarro EAJren alkategaia: "Inkestek joerak neurtzeko balio dute, baina gure buruan bakarrik dago maiatzaren 28an irabaztean"
Gehiengoei buruz itaunduta, Añibarrok azaldu du oraindik ez dutela ezer baloratu: "Helburua da maiatzaren 28an irabaztea. Gero ikusiko dugu zein aukera dauden. Legealdi honetan PSE-EErekin legealdirako akordioa lortu genuen, baina gai izan gara ere akordio mugatuak lortzeko. Hortaz, horrelako adostasunak bilatzeko gaitasuna dugu. Esan bezala, orain ez dugu hori buruan".