Elkarretaratzea egin dute gaur eguerdian Laudioko Herriko plazan, Pili Arsuaga eta Fontso Isasiren heriotzaren 33. urteurrena dela eta. Bi bizilagunak 1990ko uztailaren 1ean zendu ziren, Maribi Ramila euskal preso politikoa bisitatzera zihoazela izandako trafiko istripuan. Eurak izan ziren dipertsio politikaren ondorioz hildako lehen euskal herritarrak. Ordutik hona, euskal presoen beste 14 senide eta lagun zendu dira errepideetan.
Dipertsioa “gerra estrategia” izan zela salatu dute elkarretaratzean, eta “mingarriak” izan direla bere ondorioak. Orain, “presoen euskal herritatzearekin”, senideen eta lagunen zama “leundu” dela aitortu dute, baina aldarrikatu dute ez dela “etsi” behar. “Kontuan hartu behar dugu Entzutegi Nazionaleko salbuespeneko interpretazio gabe eta egungo legeria betez, 100 pertsona preso gutxiago izango liratekeela”. Era berean, gogorarazi dute estrategia horren erantzuleen “izen-abizenak” dituztela, “eta oraindik tematuta dirautela gurekiko etika eskaerak egiten”.
Ildo horretan, Martxelo Otamendik Andoni Uzaluren heriotza dela eta idatzitako zutabea aipatu dute. “Andoni, bere garaian, ETA p-m kidea ere bai izan zen, eta ez oinarrizkoa. Datu hori ahaztu zaie Unzaluren biografia idazterako orduan, beste batzuei ‘ETAko kide ohia’ etiketa hartzen dieten komunikabide gehienei, eta antzeko jarrera daukate alderdi politiko batzuek ETAko kide izan eta haien alderdian sartzen direnekin. Inoiz ez diete eskatu aurretik egindakoaren irakurketa kritikorik egitea eta adibide asko eta asko ditugu bai EAJn edo PSEn sartu direnekin”.
Horren aurrean, Pili eta Fontsoren eta “hildako beste senide eta kide guztien errekonozimendua” eskatu dituzte elkarretaratzean, "inoiz" ahaztuko ez dituztela ziurtatuta.
Argazkiak: Miguel Brizuela eta Txabi Alvarado