Elkarretaratze jendetsua egin dute gaur Autoglas-Glavistako langileek Laudioko fabrikako sarreraren aurrean. Bertan eman dute enpresaren egoeraren berri. “Zortzi hilabete baino gehiagoko itxaronaldiaren eta sufrimenduaren ondoren, gure egoera konponduko zela uste genuenean, Autoglas-Glavistako langileok muturreko egoeran eta desagertzeko zorian gaude”, ohartarazi dute Enpresa Batzordeko kideek.
Azaldu dutenez, duela bi aste bazirudien prozesuak “amaiera on bat” izango zuela. “Aurtengo oporrak eskatzera ere joan ginen enpresara. Baina, gauetik goizera, Guardian berriro ere eszenan agertu da prozesu osoa zapuzteko”.
Zehaztu dutenez, Guardianek “azken orduko bira” eman du enpresaren bideragarritasunerako beharrezkoak diren lursailak saltzeari uko eginez, “Glavista erosi nahi duen inbertsorearen arabera”. Langileek sumatzen dute ez dutela informazio guztia, eta “argi-ilun” asko daudela gertatutakoan, baina gauza bat dute argi: Guardian dela bizi duten egoeraren “lehen eta azken” erruduna, multinazional horrek “Parter Capital funts-putreari” saldu ziolako Autoglas-Glavista 2018an.
“Azken biraketa berri honek erakusten du Guardianen interes argia, parabrisa dibisioa guztiz desintegratzea besterik ez dela, eta bere fabrikan hainbat hamarkada lanean egon diren 240 familiaz desegitea”
“Azken biraketa berri honek erakusten du Guardianen interes argia parabrisa dibisioa guztiz desintegratzea besterik ez dela, eta bere fabrikan hainbat hamarkada lanean egon diren 240 familiaz desegitea”, ondorioztau dute Enpresa Batzordeko kideek, eta salatu dute langileak direla beti pairatzen dituztenak “milaka kilometrora dauden administrazio-postuetan hartzen diren erabakien ondorioak”.
Hori dela eta, “egungo egoerari irtenbidea bilatzea” exijitu diete “inplikatutako alderdiei, Eusko Jaurlaritzari eta erakundeei”; eta horri lotuta jakinarazi dute, “egoera honek horrela jarraitzen badu”, behar diren “mobilizazio guztiak” abiatu eta “ate guztiak joko” dituztela, “Laudioko fabrikako lanpostu guztiak salbatzeko”.