Guztira, Udalak 329.514,07 euro inbertituko ditu Fabian Legorburu HLHIn, Latiorro HLHIn eta Lamuza HLHIn egin beharreko jarduketetan. Fabian Legorburu ikastetxearen kanpoko estalkia eta arotzeria konponduko dute, Lamuzan alboko fatxada berrituko dute eta Latiorro ikastetxean kanpoko arotzerian esku-hartuko dute.
Jarduketa hauekin, Udalak “energia-eraginkortasuna hobetu” nahi du, eraikinek “ikastetxe gisa erabiltzeko erosotasun termiko onargarria” lor dezaten. Horregatik zentratuko dira eskoletako fatxadetan eta sabaietan udan egingo dituzten lanak.
Konponketak fatxadetan eta estalkietan
Lamuzan hasiko dituzte lanak, datorren astean bertan. Otsailean udal arduradunek ikastetxeko zuzendaritza-taldearekin egin zuten bileran egiaztatu zuten mendebaldeko fatxada egoera txarrean dagoela. Ondorioz, Udalak “osorik saneatuko” duela iragarri du, “estaldura jarraitu berriarekin”. Lau astez jardungo dira bertan lanean eta guztira 22.644,18 euro inbertituko dituzte bertan.
Horrez gain, gogoratu behar da eskola horretako jolastokia inklusibo bihurtzeko lanei ere ekingo diotela, Eusko Jaurlaritzaren ‘Udalpatiolaguntza’ programaren bidez eta Udalaren finantzaketa propioarekin. Lan horiek urte amaieran amaitzea aurreikusten du tokiko gobernuak.
Aretako Fabian Legorburu ikastetxean eskolako eraikin zaharreko (2. zenbakiduna) estalkian egingo dituzte konponketak. Bertan daude psikomotrizitate, musika eta informatika gelak eta gimnasio estalia. Iragazgaiztearen egoera txarraren ondorioz, itoginak eta hezetasuna agertzen dira sabaian euri garaian.
Eremu oso horren iragazgaiztea konponduko dute bi hilabete iraungo duten eta 34.606,37 euroko inbertsioa ekarriko duten lanekin. Gainera, beste 74.827,07 euro erabiliko dituzte ikastetxearen kanpoko arotzeria ordezteko ludoteka eta gimnasioa hartzen dituen eraikinean. 2019an Eusko Jaurlaritzak eraikin horren hegoaldeko fatxadako arotzeria aldatu zuen.
Latiorroko ikastetxean ere kanpoko arotzeriaren zati bat aldatuko dute. Zehazki, haurren jolastoki gisa erabiltzen den beheko solairuan esku-hartuko dute, bai eta Ortega-Gasset eraikineko bigarren solairuan ere. Lan horiek 197.436,45 euroko aurrekontua dute.