130 egun baino gehiago igaro dituzte Implikako langileek greban, enpresak egin nahi zituen 150 kaleratzeen aurka (horietako 89 Bilboko egoitzakoak). “Zuzendaritzak 33 eguneko kalte ordaina proposatu zuen kaleratzeagatik, 12 hileko mugarekin”, azaldu du ELAk. Sindikatu horrek izan du gehiengoa negoziazio mahaian, eta proposamena baztertu zuen, “Andaluziako eta Valentziako bi zentrotako ordezkaritzekin batera”.
Grebaz gain, “borroka judiziala” ere abiatu zuten kaleratzeen aurka, eta emaitzak izan ditu. Espainiako Auzitegi Gorena langileen alde lerratu zen, eta horren ostean ELAk akordioa sinatu zuen zuzendaritzarekin, beharginek asanbladan onartu ostean.
Sindikatuak zehaztu duenez, akordioak eragina izango du Implikak Espainiako Estatuan dituen lantoki guztietan. Adostutakoaren arabera, nahi duten langileek aukera izango dute lanera itzultzeko, 15 hilabeteko enplegu bermearekin. “Diziplinaz kanpoko kaleratze orok 40 eguneko kalte ordaina izango du, mugarik gabe”, gaineratu dute langileen ordezkariek.
Lanera itzuli nahi ez dutenek, aldiz, 45 eguneko kalte ordaina jasoko dute eta, horrez gain, 3.000 euro lineal jasoko dituzte.
Edurne Ibarretxeren bizipenak
Lanera itzuli ez diren langileen artean dago Edurne Ibarretxe. ELAko ordezkaria izan da Laudioko bizilaguna greban zehar. Bere hitzetan, ez da prozesu “batere erraza” izan, baina pozik dago lortutako emaitzarekin. Sindikatuaren jarrera goraipatu du bereziki, langileen alboan egon delako “eguneko 24 ordutan eta asteko 7 egunetan”.
Era berean, Ibarretxe “harro” azaldu da bere lankideekin batera garatutako “lan eta borrokaz”. “Hau izan da nire lehen Enplegua Erregulatzeko Espedientea eta espero dut azkena izatea, baina argi daukadana da borroka dela bide bakarra”.