Pasa den astean deitutako kontzentrazioa bertan behera utzi ostean tenperatura altuengatik, gaur Laudioko Herriko plazan elkartu dira hainbat lagun salatzeko Guardian konpainiak blokeatu dituela Glavista enpresak bizirauteko dituen aukerak.
Izan ere, multinazionalak uko egin dio Glavistaren balizko erosleak nahi dituen lursailen salmenta ahalbidetzeari eta 240 familien lanpostuak airean daude oraindik. Abuztuan, gainera, ez dira berri asko egon.
Laster behargin batzuek espedientea utziko dute tarte batez, lantegian dauden lehengaiak eta produktuak ateratzeko eta saltzeko, horrela dirua biltzeko eta soldatak ordaintzeko asmoz, baina, muinean, egoera ez da argitu.
Irailaren amaieran agortuko da aldi baterako lan-erregulazio espedientea eta salmenta ez bada egikaritzen, enpresa desagerrarazteko eta beharginak kaleratzeko prozesua jarriko dute abian. Hala eta guztiz ere, prozedura azarora arte luzatu daiteke.
Bitartean, langileek mobilizazio eta bilera egutegia prestatzeari ekingo diote, irailean euren arazoak jendarteratzeko.