Iñigo Martinez Sagastizabal sortzaile laudioarrak Una quimera de vida idatzi zuen 2020ko itxialdian eta aste honetan hiru aurkezpen izango ditu Bizkaian. Ostegunean Bilboko Karmelan (Santutxun) egingo du 19:00etan, hurrengo egunean La Kelo Gaztetxean ordu berean eta azkenik Xake espazioan (Bilbo Zaharrean) 17:30ean. Ekainean Laudion bertan egin zituen solasaldiak.
Liburua ez da autobiografia, baina egilearen bizipenak ditu oinarri. Zehazki, protagonista Bruno da, osteogenesis inperfektua -kristalezko hezurren gaitza- duen nerabea. 1995. urtean girotuta dago eta bere bizitzaren une erabakigarriak azaltzen ditu testuak.
Hain zuzen, eleberriak kontatzen du Brunoren borroka bere autonomia lortzeko eta bidean topatzen dituen oztopo,, kontraesanak eta ezusteak. Familiaren laguntza eta beldurrak, sentimendu berrien loraldia, muga zaharrak gainditzea edota bere lehen kontzertua.
Una quimera de vida aniztasun funtzionala duen gazte baten saminak eta ospitale egonaldiak deskribatzen ditu, jakina, baina baita itxaropenerako uneak eta sentsazio berriak ere. Izan ere, osteogenesis inperfektua beti presente badago ere, bizitza gozatzeko grina eta tokikotasunak ere pisu handia daukate eta irakurle askok erreferente ezagunak izango dituzte.
Liburu baten zozketa
Testua oraindik irakurri ez dutenek -Zuhaitza liburudendan salgai dago- aukera izango dute irailaren 22an eskuratzeko zozketa egingo baitu Aiaraldeak 15:00etan. Izena emateko tartea dago hemen.