Laudioko Merkatarien Elkarteak kontsumitzaileek herriko zerbitzu sektorearen inguruan duten iritzia ezagutu nahi du: zer duten faltan, behar dutena aurkitzen duten ala ez... Horretarako, galdetegi bat jarri zuen Laudio Berrikusi aplikazioaren erabiltzaileen eskura -dagoeneko 3.000 pertsonak baino gehiagok deskargatu dute mugikorrean- eta horien erantzunekin Laudioko zerbitzuen inguruko azterketa bat egin nahi du.
Galdeketa sustatzeko parte-hartzaileen artean 100 euroko hiru opari-txartel banatuko dituela iragarri du APPILLek. Gainera, gogoratu beharra dago hau ez dela Laudio Berrikusi aplikazioan egun zabalik dagoen zozketa bakarra; izan ere, urriaren 16ra bitartez Laudioko saltokietan gutxienez 10 euro gastatzen dituztenen artean 1.000 euro zozkatuko ditu elkarteak, baldin eta tiketak aplikaziora igotzen badituzte. Ongi etorri udazkena kanpainaren barruan dago ekimena eta helburua aplikazioaren erabilera sustatzea eta erabiltzaile berriak eskuratzea da.
Laudioko Altxorrak
Gaur "udalerriko negozio txikiak sustatzea eta balioestea" helburu duen ekimenaren bigarren edizioa izango da. Ekitaldian hainbat sari banatuko dituzte Laudioko merkataritza eta ostalaritza establezimenduen artean. 20:30ean hasiko da sariketa Laudioko Kasinoan eta Nira abeslari eta musikagile laudioarrak kontzertua emango du bere bandarekin batera.
