Europako Next Generation funtsen bidez finantzatu behar zen Laudioko Abasto Plazaren birgaitzea. Guztira, 1,4 milioi euroko dirulaguntza tramitatu zen aurreko legealdian proiektua bideratzeko, baina abiatutako proiektuaren kudeaketak ez zuen ahalbidetzen aurreikusitako dirulaguntza jasotzea. Horrela azaldu dute Laudioko Udal Gobernua osatzen duten EH Bildu eta Omnia alderdiek.
Hain zuzen, Europako funtsa jasotzeko ezarritako epeek ez dute bideragarri egiten birgaitze proiektua horrela finantzatzea. Dirulaguntza deialdiaren arabera, 2024ko ekainerako lanen %60 gauzatua egon beharko lirateke. Horretarako, ordea, proiektua aurtengo ekainean egon beharko luke lizitatua eta lanak abuztutik abiatuak. "Ekainean iritsi ginen Udal Gobernura eta egoera horrekin egin genuen topo", azaldu du Ainize Gastaka alkateak.
Udala alternatiba baten bila aritu dela azaldu du Gastakak: "oraingo legealdia hastean eta egoeraz jabetzean, lanak burutzeko epeak luzatzea eskatu genuen, baina ez dugu baiezko erantzunik jaso". Gauzak horrela, diru-laguntza horri uko egitea beste aukerarik ez du izan tokiko gobernuak. Aurreratutako dirua "ahalik eta lasterren" itzuliko dutela azaldu dute; "interes handirik sor ez dezan".
"Gobernu taldetik ezinbestekoa ikusten dugu Abasto Plazaren birgaitzeari ekitea"
Proiektuarekin aurrera
Abasto plazako obrarekin aurrera jarraitzeko konpromisoa azaldu du Udal Gobernuak: "Gobernu taldetik ezinbestekoa ikusten dugu Abasto Plazaren birgaitzeari ekitea. Ingurune honetako hiri-birsorkuntzari eta haren balioespenari heltzeko konpromisoa agertu nahi dugu".
Agertoki berri honetan, Abasto Plazako lanak funts propioekin burutuko ditu Udalak eta, aldi berean, finantziazio aukera eta laguntza berriak aztertuko dituzte.
Prozesu parte hartzailea
Urtea amaitu baino lehenago lizitatu nahi dute obra. Aurretik, bi hilabeteko epea jarri dio Udalak bere buruari proiektua hobetuko duen prozesu parte-hartzaile bat garatzeko. Diseinatuta dagoen proiektuaren gaineko ekarpenak bildu nahi ditu Udal Gobernu Taldeak. Horren adibide jarri dute: orain arte definitutako proiektuak aurreikusten ez dituen elementu historikoak mantentzea edota Abasto Plaza inguruko zuhaitzak ez kentzea.
Lehenik eta behin, Abasto Plazako merkatariekin batzartuko dira. Lehenengo sektoreko ekoizleei ere interpelazio zuzena egin diete, Abasto Plaza berriak beharrezko azpiegiturak aintzat hartuz gero tokiko ekoizleen merkatua bertara mugitzeko aukera planteatuz. Prozesuan herritar orok parte hartzeko bideak aztertuko ditu Udalak datozen asteetan.