Patata minak ikuskizunaren entsegu irekiaz gozatzeko aukera izan zuten ostiral gauean Faktoriara gerturatu ziren pertsonek. Aurreko egunetan espazio berean eginiko sormen egonaldian garatu dute emanaldia Ane Gebarak eta Aitor Vinagretek, eta lehen zirriborroa plazaratu zuten ikusleen aurrean. Ondoren, solasaldi laburra eskaini zuten, publikoaren iritzi eta inpresioak jasotzeko.
Alea komunikabidearen egitasmo baten barruan abiatu zuten proiektua bi sortzaileek, baina gehiago garatzeko gogoa sartu zitzaien gero. Horretarako baliatu dute, hain zuzen, Faktoriako egonaldia. Solasaldian kontatu dutenez, arabarren inguruan dauden topikoez barre egitea da ikuskizunaren xedea, patata abiapuntu moduan hartuta. "Oraindik askotan esaten dizkigute 'Ze ondo hitz egiten duzu euskaraz Gasteizkoa izateko' bezalako komentarioak, horri barre egin nahi genion", azaldu zuen Gebarak.
Entsegu irekiak
Ane Gebara eta Aitor Vinagretena ez da izan Faktorian eskaini den lehen entsegu irekia. Aurreko astean Paula Urquijo dantzari laudioarra egon zen Faktorian entseatzen, eta Ameba ikuskizunaren lehenbiziko bertsioa eskaini zuen gero.
Datorren astean Joseba Agirrezabalagaren txanda izango da. Marrazketa eta soinua uztartuko ditu sortzaileak, eta azaroaren 3an eskainiko du entsegu irekia, 20:00etan. Sarrera doakoa izango da.
