Elkarretaratzea egingo dute bihar (azaroak 2, osteguna) Laudioko Udaleko langileek, larunbatean Euskalgintzaren Kontseiluak deitutako mobilizaziora batzeko deia lutzateko. 11:00etan bilduko dira Udaletxearen aurrean, eta talde-argazkia egiteko ere baliatuko dute zita.
LAB sindikatuak sustatu du mobilizazioa. Sindikatuaren arabera, "oso eraso larria" da EAEko Justizia Auzitegi Nagusiak hizkuntza ofizialen erabilera instituzionalaren aurka berriki emandako ebazpena, eta horrek "are beharrezkoagoa" bihurtzen duela asteburuko zita. Bilbon izango da larunbateko mobilizazioa, 17:00etan Euskalduna Jauregitik abiatuta.
"Udal eta foru administrazioko langileek epaileen eraso ugari pairatu dituzte. Langileei ez zaie bermatzen euskaraz lan egiteko eskubidea. Herritarrei, oro har, urratu egiten zaie zerbitzu publikoa euskaraz jasotzeko eskubidea", salatu du sindikatuak. Gauzak hala, nabarmendu du udal eta aldundietako langileak "bete-betean" pairatzen ari direla "euskararen aurkako oldarraldi judiziala". Horregatik erabaki du sindikatuak mobilizazioak sustatzea oldarraldi hori pairatu duten erakunde batzuetan, Laudioko Udalean kasu.
Kontuan hartu behar da 2022ko otsailean epaile batek "euskararen zailtasuna" erabili zuela argudio gisa Laudioko Udaleko langile bat berriz kontratatzea agintzeko. Euskalgintza Kontseiluak elkarretaratze jendetsua egin zuen orduan Udaletxearen aurrean, biharko mobilizazioa egingo den toki berean.