Ez dago albiste berririk Autoglas-Glavistaren itxiera prozesuaren aferan. Hala jakinarazi dute enpresa horretako beharginek eta Guardian lantegikoek gaur eguerdian elkarrekin eskainitako prentsaurrekoan. “Urtebete baino gehiago igaro da ametsgaizto hau hasi zenetik, urtebete baino gehiago daramagu iristen ez diren soluzioen zain”, salatu dute bi enpresetako beharginek.
Behin baino gehiagotan azaldutakoa jarri dute beharginek berriro mahai gainean: badagoela Autoglas-Glavistan interesa duen inbertsore bat, badagoela jarraipenerako proiektu bat, baina ez dagoela interesik Guardianen partetik egoera desbloketazeko. “Duela hilabete bat jakinarazi zitzaigun Guardian eta Amineren (balizko eroslearen) artean elkarrizketak berrabiarazi zirela, lursailen aferarekiko zeuden desadostasunak konpontzeko. Eta duela hilabete batetik gabiltza beste inolako albisterik izan gabe”. Horregatik, langileek uste dute Guardianen estrategia bat izan dela, “denbora galtzeko” bere “anabasa judiziala” konpontzen saiatzen den bitartean. “Denbora igarotzen utzi nahi dute, Glavistako 200 langileek kontratuak iraungi arte”.
Gauzak hala, “negoziatzera esertzea” exijitu diote multinazionalari, “berak sortu duen gatazka konpontzeko beharreko baliabideak jarriz”. Langileen aburuz, Autoglas-Glavistaz gain, Guardianen Laudioko lantegia ere dago jokoak: “ez dugu lantegi horietarako proiektu seriorik ikusten, eta erakundeek beraiek ohartarazi digute multinazionalak interes falta duela inbertsioen bidezko bermeak ezartzeko”.
“Domino baten lehen pieza”
Beharginen aburuz, gertatzen ari dena, “enpresa arazo bat” baino, “espekulazio arazo” bat da, “enpresa-iruzur arazo bat da, eta eskualdearen desindustrializazioarena ere bai”. Ohartarazi dutenez, beiraren sektorea suntsitzen ari dira.
Gauzak hala, “berehala” jardutea exijitu diete erakunde publikoei, “multinazional hauei boterea kentzeko”, etaaurreikuspen oso ezkor bat jarri dute mahai gainean: “Autoglas-Glavista ixten bada, Aiaraldeko eta Arabako enplegu susntsiketaren dominoaren lehen pieza baino ez da izango, eta hori ezin da onartu”.