Ehunka lagun batu ziren atzo iluntzean Autoglas-Glavista fabrikako langileek deitu zuten manifestaziora. Laudioko kaleak zeharkatu ostean, lantegiko atean amaitu zuten mobilizazioa, txalo zaparrada eta itxieraren aurkako oihu artean. Duela urtebete baino gehiago hasi zen langileek "amesgaiztotzat" jo duten prozesua: Autoglas-Glavista hartzekodunen aurrelehiaketan sartu zen eta 240 beharginen bizitzak guztiz baldintzatuta geratu ziren.
Egoera blokeatuta
Denbora honen guztiaren ostean, konponbidearen zain jarraitzen dute Glavistako langileek. Prozesu juridikoa geldirik dagoela salatu zuten atzoko manifestazioan: "langileen egoerarentzat garrantzitsuak diren ebazpen judizialen zain gaude, baina itxaronaldia jasanezina izaten ari da".
"Enpresa erabaki espekulatzaile eta suntsitzaileak ezin dira jendearen gainetik egon, ezta erakundeen gainetik ere"
Autoglas-Glavistaren egoera guztiz blokeatuta dago, "behar den guztia" mahaigainean dagoen arren, langileen aburuz. "Inbertsore interesdun bat dago, jarraikortasun proiektu bat dago, baina ez dago Guardianen interesik egoera desblokeatzeko".
Langileak "etsipen egoeran" daudela nabarmendu zuten: "Enpresa erabaki espekulatzaile eta suntsitzaileak ezin dira jendearen gainetik egon, ezta erakundeen gainetik ere".
Erakundeei deia
Eskaera zuzena luzatu zioten Eusko Jaurlaritzari eta Arabako Foru Aldundiari: egoera bideratzeko irtenbideak bilatzea. Horri lotuta, Autoglas-Glavistako gatazka konpontzea "lehentasunezko" kontu bat izan behar dela aldarrikatu zuten beharginek.
"Hau ez da enpresa arazo bat, ezta soldata-kostuen arazo bat. Espekulazio arazoa da hau, enpresa iruzurren ondorio zuzena; eta eskualdeko desindustrializazioa sortzen ari da", salatu zuten manifestazioaren amaieran irakurritako testuan. Izan ere, fabrika itxiz gero, "domino baten lehen pieza" izango dela ohartarazi zuten. Hori dela eta, Aiaraldeko desindustrializazioa gelditzeko "baliabide guztiak" jartzea eskatu zieten instituzioei.
