Urte berriarekin batera argitaratuko da La Seca, Txani Rodriguezen liburu berria. Idazle laudioarrak Espainiako estatuaren hegoaldean girotu du bere eleberri berria, naturgune babestu batean dagoen eta kortxoa ekoizten duen herri batean.
La seca, hain zuzen, artelatzen (kortxoa ekoizteko baliatzen diren zuhaitzak) gaixotasun bati egiten dio erreferentzia. Gaitz hori herrira iristen denean, bertako auzokideek beste bizimodu batzuk bilatzeari ekingo diote, eta horrek talka egingo du herrira uda igarotzera doazen hiritarrekin, hauen lehentasuna ingurunea babestea izango delako.
Istorio horren bidez, etorkizuna ikusteko bi modu irudikatuko ditu Rodriguezek, Nuria izeneko protagonistaren bidez. "Protagonista ere apur bat lehorra iruditu dezake, baina epaitzeko ezagutu egin behar da lehenbizi", azaldu du idazleak bere sare sozialetan, "urtarrilean, hala nahi baduzue, istorio hau zuena izango da nirea baino gehiago".
Hain zuzen, urtarrilaren 17tik aurrera eskuratu ahalko da liburua, baina aurresalmenta abian dago dagoeneko. Seix Barral argitaletxearekin errepikatu du Rodriguezek oraingoan ere, 2020an Los últimos románticos nobela plazaratu eta gero. Obra hori izan zen idazle laudioarrak orain arte plazaratutako lanik entzutetsuena, Euskadi Literatura Saria irabazi baitzuen.