Gernikan abiatu dute Txani Rodriguezen Los últimos románticos eleberrian oinarritutako filmaren grabaketa. David Perez Sañudo zuzendariak hartu du idazle laudioarraren lana pantaila handira egokitzeko ardura. Sañudoren bigarren film luzea izango da honakoa, Ane filmaren ondotik. Ekoizle lanetan La trinchera infinita pelikula sarituaren atzetik egondako ekoizle berdina dabil. Protagonista nagusiaren papera, aldiz, Miren Gaztañaga aktoreak interpretatuko du.
Bakardadearen gaia du hizpide idazle laudioarraren eleberriak, "komunitatearen zentzua eta klase kontzientzia zeharo galdu diren garai batean". Obra honi esker Euskadi Literatura Saria irabazi Txani Rodriguezek 2021ean.
Grabaketa Laudion
Gernikan ekin diote filma grabatzeari, baina hurrengo asteetan beste hainbat lokalizazioetan ere izango da Sañudoren lantaldea, hala nola: Lisboa, Ronda eta Sevilla. Laudion ere grabatuko dituzte hainbat eszena. Otsailaren 14an izango da filmaketa eta, besteak beste, tren geltokiaren inguruetan arituko dira zinemagileak.
Hain zuzen ere, Laudio oso presente dagoen elementua da Txani Rodriguezen eleberrian. Esplizituki horrela zehazten ez den arren, liburuko pasarteak gertatzen diren eszenatokiak Laudioko txoko ugari ekartzen dituzte gogora. Euskadi Literatura Saria irabazi berritan, Aiaraldea Komunikabideak ibilaldia egin zuen Txani Rodriguezekin eleberria inspiratu zuten txoko desberdinak ezagutzeko.
Horrez gain, duela bi aste Poliedroa bideo-podcast saioan egon zen idazlea, bere azken eleberriaz hitz egiteko:
