Kultur sorkuntza Aiaraldean

Bi Goya sari eskuratu ditu Esti Urresola laudioarrak, herrikideen berotasuna lagun

Aimar Gutierrez Bidarte 2024ko ots. 11a, 20:25
Esti Urresola Goya saria eskutan, eta Gazaren aldeko pegatina paparrean. / Premios Goya

Esti Urresolak bi Goya sari eskuratu zituen bart. Gazako herritarrak eta Laudioko bizilagunak izan zituen gogoan bere hitzartzeetan. Hirugarren sari bat ere jaso zuen 20.000 especies de abejas filmak, aktore zerrendako onenarena.

Zuzendari hasi berri onenaren eta gidoi onenaren Goya sariak esku artean dituela itzuli da etxera Esti Urresola zinemagilea. Duela urtebete Berlineko Nazioarteko Zinema Jaialdian abiatutako bide arrakastatsuan mugarri berria jarri du zinemagile laudioarraren lehenengo film luzeak. Zuzendariak lortutako bi sariak ez ezik, hirugarren estatuatxo bat ere etxeratu zuen 20.000 especies de abejas filmak, Ane Gabirainek irabazitako aktore zerrendako onenaren Goya saria.

Opera prima batek inoiz izandako izendapen kopuru handienarekin -15- abiatu zen Urresolaren lan-taldea Valladolideko sari banaketara. Espainiako Zinema Akademiak, ordea, Juan Antonio Bayonaren La Sociedad de la Nieve goraipatu du gehien, film onenaren sariarekin, besteak beste.

Gazako sarraskia gogoan

Urresolak Palestinako herritarrak izan zituen gogoan bere lehenengo hitzartzean, paparrean Gazaren aldeko pegatina bat jantzita zuela. Sortzaile laudioarrak azaldu zuen gauzei dagokien izena emateak duen garrantziaz jarduten duela 20.000 especies de abejas filmak; eta, modu berean, Israelek Gazako herritarren aurka darabilen sarraskiari ere genozidioa deitzea eskatu zuen. 

Babesa Laudiotik

Zinemagile laudioarrak herrikideen babesa eta berotasuna jaso zuen bart. Urresolak berak Laudioko bizilagunen berotasuna eskertu zuen gidoi onenaren saria jasotzerakoan. Hain zuzen ere, Laudioko Udalak sari banaketa ekitaldia zuzenean jarraitzeko pantaila erraldoia jarri zuen Alberto Acero enparantzan, eta Urresola animatzeko milaka pegatina banatu zituen herritik. Asko eta asko izan ziren ere bere burua erlez mozorrotu zutenak, ostalari eta komertzio ugari tartean.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide