Otsailaren 14an bilera egin zuten Laudioko Udalak eta Osakidetzako hainbat arduradunek. Ainize Gastaka alkatea, Alvaro Barrios lehen alkateordea eta Nagore Gomara Zeharkako Politiken zinegotzia bildu ziren Osasun Saileko sailburuarekin, Gotzone Sagarduirekin, sailburuaren kabineteburuarekin, Imanol Zuluaga Zamalloarekin, eta Osakidetzako zuzendariarekin, Rosa Perez Ezquerdorekin.
Udal gobernu taldeko kideek hurrengo egunean egin zuten batzarraren balorazioa eta azaldu zuten, euren iritziz, ez zela emaitza positiborik egon.
Bere aldetik, Osasun Sailak oharra zabaldu du salatzeko Laudioko Udalak bertsio partziala eskaini duela. Hain zuzen, osasun erakundeak argudiatu du ordezkariak identifikatu zituela bien arteko komunikazio bizia egoteko, Udalaren eskaerari erantzunez.
Medikua Etengabeko Arreta Gunean?
Laudioko Udalak gogor salatu zuen beste puntu bat izan zen Osakidetzak ez zuela konpromisorik hartu larrialdi zerbitzuetan medikua egon dadin beti. Horren aurrean, honakoa adierazi du Osakidetzak: "Osasun Sailarentzat garrantzitsua da bermatzea osasun erantzuna egotea edozein kasuan, medikua egon edo ez, une jakin batean, eta arreta hori bermatuta dago".
Zehazki, azalpen hori honako adierazpenekin osatu du osasun erakundeak: "Osasun Sailak Laudioko Udalari gogorarazi zion, askotan azaldu den bezala, ez dagoela familia-medikuntzako espezialista nahikorik Osakidetzak eskaintzen dituen plaza guztiak betetzeko; horregatik, Osasun Sailaren erantzuna izan zen Laudioko Etengabeko Arreta Guneetarako pertsona bat kontratatzeko prest dagoen bitartean, egingo dela, Osakidetzako protokoloetan EAG hori lehentasunezko zentroa delako. Medikuntzako lanpostu bat bete ezin denean, arreta erabat bermatuta dago gainerako osasun-sarean: etxeko arreta, gertuko EAG, anbulantziak eta larrialdietako helikopteroa eta ospitaleko larrialdiak".
Larrialdien informazioa
Azkenik, Osasun Sailak aipatu du protokoloa eta aplikazioa prestatzen ari dela anbulatorioen eta Etengabeko Arreta Guneen gaineko informazioa eskaintzeko herritarrei.