David Hernandez laudioarraren heriotzaren harira, Laudioko Udaleko ordezkariak eta Eusko Jaurlaritzako Osasun Saileko arduradunak elkartu ziren atzo Bilbon. Izan ere, urtarrilaren 12an zendu zen 42 urteko gizonezkoa Laudioko anbulatorioko Etengabeko Arreta Gunean, mediku baten laguntza jaso gabe.
Bilerari dagokionez, Osasun Saileko sailburuarekin, Gotzone Sagarduirekin, sailburuaren kabineteburuarekin, Imanol Zuluaga Zamalloarekin, eta Osakidetzako zuzendariarekin, Rosa Perez Ezquerdorekin, batu ziren Ainize Gastaka alkatea, Alvaro Barrios lehen alkateordea eta Nagore Gomara Zeharkako Politiken zinegotzia.
Laudioko anbulatorioaren egoera aztertzea izan zen hitzorduaren helburua. Tokiko erakundeko ordezkariek hiru gai jarri zituzten mahai gainean, prentsa ohar batean adierazi dutenez: "Etengabeko Arretako Gunean (EAG) medikuen presentzia bermatzea, pertsonal medikurik ez dagoenean herritarrei behar bezalako informazioa ematea, eta Osakidetzarekin hitz egiteko lerro bat ezartzea, Laudiorako proiektatutako anbulatorio berrian giza baliabideen eta zerbitzuen hornidura egokia bermatzeko".
Erantzunik ez
EH Bilduk eta Omniak osatzen duten gobernu koalizioak zabaldu du Osasun Sailak ez ziela erantzun egindako aldarrikapenei, eta "etsipena" adierazi du horregatik.
Erantzun bateratua eskualdean
Ainize Gastaka alkateak honakoa azpimarratu du: "Laudion eta eskualdean zerbitzua ziurtatu behar dugu. Erreferentziazko anbulatorioa izango gara eta osasun langileez gain medikuen presentzia bermatu behar dugu". Horregatik, hain zuzen, Aiaraldeko tokiko erakundeen erantzun bateratua sustatuko du Laudioko Udalak.
Hasteko, bilera egingo dute inguruko udalekin, euren kezkak partekatzeko. Horrez gain, Arabako Sendagileen Elkargoarekin ere harremanetan jarriko dira: "Izan ere, atzo bertan, elkargoa kezkatuta agertu zen Osasun Administrazioak urtarrilaren 12an Laudion gertatutakoari emandako erantzunaren ostean".
