SOS Aiaraldea plataforma kalera atera zen atzo Osakidetzako zerbitzuaren egoera salatzeko eskualdean: "Kezkatuta gaude, haserre. Eskualdeko Etengabeko Arreta Guneetan mediku edota pediatra falta egun askotan, Galdakaoko ospitalera joateko garraio maiztasun nahikorik ez, eta osasun profesionalen lan-gainkargen ondorioak pairatzen ditugu, besteak beste. Honek guztiak arriskuan jartzen gaitu eta osasun zerbitzuetarako irisgarritasunean eragiten du, gure osasun eta ongizatean eragin zuzenak dituelarik".
Plataformako kideek Gotzone Sagarduy Osasun Sailburuari exijitu zioten neurriak hartzeko egungo egoera behingoz konpontzeko eta osasun publiko eta kalitatezkoa bermatzeko.
Halaber, deitzaileek salatu zuten mobilizazioak ez zirela hasi David Hernandezen heriotzarekin, aspaldidanik baitago mahai gainean Osakidetzaren prekarizazioa eta pribatizazioa. Hori dela eta, martxoaren 16an EAEko hiriburuetan egongo diren manifestazioetara batzera deitu zuten. Horrez gain, herritar guztiei luzatu zieten datorren martxoaren 5ean egingo den eskualdeko asanbladara bertaratzeko gonbita, 19:30ean Laudioko Herriko plazako erabilera anitzeko aretoan.
Argazkiak: Naia Vallejo Torres