Tere Cosanok Solastiar elkarteko presidente gisa eginiko lana aitortu du Arabako Foru Aldundiak. Martxoaren 8aren bezperan egin zuten omenaldia, Gasteizko Artium museoan, eta Arabako beste 6 emakumeren ibilbidea ere goraipatu zuten:
- Victoria Cañas, Díez-Caballero upeltegiaren buruan ibilbide luzea duen enpresaburua.
- Silvina Salinero, indarkeria matxistatik bizirik atera dena eta Aguraingo Sallurtegui elkarteko kidea.
- Maria Luisa Garate, Lagunak elkarteko eta Rivabellosako Cáritas elkarteko kidea.
- Feli Lopez de Robles, Gure Soroa Arabako Emakumeen Elkarteko kide eta Apodakako fede emailea izan zena.
- Bene Txasko, Kanpezuko Emakumearen Kultura Elkartearen sortzailea.
- Amaia Cadavid, Trebiñuko Udalaren lehen berdintasun planaren bultzatzailea.
Ekitaldian oroigarri bana eman zieten zazpi emakumeei, era Ramiro Gonzalezek hartu zuen hitza. “Harro sentitzen gara zuetaz, berdintasunean aurrerapenak lortzeko denbora asko eman eta ahalegin handia egin duzuen emakumeez; aurrerapenak zuentzat eta, batez ere, gainerako emakumeentzat”, nabarmendu zuen Ahaldun Nagusiak. Bere hitzetan, Araban "emakume indartsu ugari" daude, "eta indar hori erabili dute oztopoak gainditzeko, hesiak hausteko eta gazteenei beren ondarea eta urteetan zehar metatutako jakinduria transmititzeko”.