Nola jarraituko duzue larunbateko finala?
Badaude zozketetan Sevillara joateko sarrera lortu duten kideak. Joan etorriko bidaia egingo dute, lo egitera gelditu gabe. Baina, gaztelaniaz esaten den moduan; sarna con gusto no pica.
Laudion geratuko garen kideok egun osoko egitaraua prestatu dugu. 13:00etan poteoa egingo dugu Latiorrotik. Pagolar tabernan amaituko dugu poteoa, bertan dauka gure peñak egoitza. 15:30ean bazkaltzera eseriko gara. Bazkari herrikoia izango da, ez peñako kideontzat soilik. Aspaldi iragarri genuen eta nahi izan duen orok izan du izena emateko aukera. Berakatz zopa eta sukalkia jango ditugu hamar euroren truke.
Bazkalostean DJ bat kontratatuko dugu, eta finalaren ordua iritsi ahala hau ikusteko prestatuko gara. Proiektore eta pantaila handi bana lortu ditugu, eta kalean ikusiko dugu partida, Pagolar tabernaren aldameneko plazatxoan.
Athleticek irabaztekotan, nola ospatuko duzue?
Ez dugu pentsatu, gauza horiek berariaz sortzen dira. Partida amaitu ostean zertxobait luzatuko gara Pagolar tabernan, eta gero norberak ikusiko du festa non jarraitu.
Ziur naiz izugarrizko festa egongo dela. Azken finean, larunbatean goizean goizetik egongo gara ospakizunetan murgilduta. Athleticen zaleak horrelakoak gara; galdu edo irabazi, beti dago zer ospatu, finala bera ospakizun bat da.
Eta galtzekotan, prest zaudete egoera horri aurre egiteko?
Ez, uste dut zaleak ez daudela horretarako prest. Esango nuke Athleticen zaleen %95a ziur dagoela aurtengo Kopako txapeldunak izango garela. Ezuste handia litzateke ez irabaztea.
Zer nolako finala aurreikusten duzue?
Final gogorra izango dela uste dut. Athletic indartsu dago, baina Mallorca ere bai, finalera iritsi bada zerbaitengatik izango zen. Urduritasun handiarekin jarraituko dugu zaleok, Athleticek jolasten duen bakoitzean urduritasuna pizten da eta.
Oker ez banago, Mallorcak behin bakarrik irabazi du Kopa, eta Athleticek ez du azken berrogei urteetan irabazi. Bi taldeek dituzte haien onena emateko arrazoiak. Espero dut Athleticek irabaztea baina, epaileak 90. minutuan txistua jo arte, ez dago ezer erabakita.