Okzitaniako Saint Orenseko Bigarren Hezkuntzako institutuak España una, Portugal cero film dokumentala erabili du Gerra Zibila jorratzeko bere ikasleekin. Aurten 50 gaztek osatutako hiru gelek ekin diote hori egiteari eta hurrengo ikasturtean ere egingo dute.
Modu horretan, Javi Gil laudioarrak zuzendutako lana txertatuko dute ikastetxeko eduki akademikoen artean. Gilek iaz sortu zuen filma Santi Ric aragoiarrekin batera, Izaskun del Cerro urduñarraren musikarekin.
Berez, Jose Ric Derneren bizitza kontatzen du dokumentalak. Gizon hori Santi Ric beraren senidea da eta aukera izan zuten bera elkarrizketatzeko 103 urte zituenean. Ric Dernek bizitza latza izan zuen: 16 urterekin izena eman zuen Errepublikaren alde borrokatzeko, Frankismoaren kartzelak ezagutu zituen eta gero, Frantziara erbesteratuta, nazien aurkako erresistentzian parte hartu zuen, harik eta kontzentrazio esparru batean sartu zuten arte.
Filmea AP-68 ekoiztetxe euskal-aragoiarrak egin duen lehen dokumentala izan da eta, ikusi daitekeenez, harrera ona izan du. Berez, Santi Ric gonbidatu zuten ikasleek egindako lana ikusteko, dokumentalean oinarritutako erakusketa sortu baitzuten.