Grebara joko dute berriz Laudioko kamioien aparkalekuko langileek, eta oraingoan astebetez luzatuko dute protesta, apirilaren 15etik 21era.
Modu horretan lortu nahi dute gaur egun duten egoerari buelta ematea. ELA sindikatuak azaldu duenez, hitzarmen estatala aplikatzen zaie aparkalekuko beharginei. Ondorioz, gutxieneko soldata kobratzen dute, eta legez izan dezaketen jardunaldi luzeena dute. Horrez gain, "segurtasun eta prebentzio arazoak" dituztela ere nabarmendu dute langileen ordezkariek.
Horren aurrean, hitzarmen propio bat sinatzea dute helburu. Horrela lortu nahi dute 19.600 euroko gutxieneko soldata izatea, jardunaldia murriztea, jai egunetan eta gaueko txandetan hobekuntzak ezartzea eta hobekuntzak egotea lan osasunean zein instalazioen egoeran.
Horrez gain, "Udalarekin komunikazioa hobetzea" ere eskatu dute. Izan ere, tokiko erakundea da aparkalekuaren jabea, baina EYSA enpresak kudeatzen du azpiegitura. Langileak martxoan bildu ziren udal gobernuko ordezkariekin, eta hauek denbora eskatu zieten, aparkalekuaren eta langileen eskaeren bideragarritasuna aztertzeko. Horregatik, kezkatuta daude langileak, uste dutelako Udala aparkalekua ixtera iritsi ahalko litzatekeela, bideragarria ez dela ebatziz gero.
