Duela hiru urte ireki zuela Faktoria espazioa Aiaraldea Ekintzen Faktoriak. Geroztik, 250 ekitaldi baino gehiago antolatu dira bertan, alor eta izaera anitzekoak: kultur emanaldiak, solasaldiak, tailer edo ikastaroak... Gauzak hala, gaur arte egindako ibilbidea komunitatearekin ospatzea izango du xede urtemuga festak.
Ez da, ordea, egun edo ekintza bakarrera mugatuko. Iragan larunbatean (maiatzak 18) haur eta familiei zuzendutako jaia antolatu zuten, ehundik gora lagun elkartu zituztelarik zirku guneak, puzgarriak, pizza tailerrak zein Walas magoak.
Haur eta familiei zuzendutako jaia antolatu zuten iragan larunbatean, ehundik gora lagunen parte hartzearekin
Festa nagusia, larunbatean
Bigarren eta azken traka larunbat honetan izango da, maiatzak 25. Laudioko herriko plazatik abiatuko dute egitaraua, Sorginlarreneko kideekin batera hainbat kale lotuko dituen kalejirarekin. 18:30ean izango da hitzordua herriko plazan, eta Alberto Acero zein Zubiko Malekoia zeharkatuko dituzte, 20:00etan Faktoriara iristeko. Hain zuzen, ordu horretan izango da parrillada, doan. Gainera, Faktoriako merchandising postua ere egongo da, argazki erakusketarekin batera.
Parrillada, argazki erakusketa eta Anariren kontzertua egongo dira, besteak beste, Faktorian, 20:00etatik aurrera
Anarirena izango da kultur emanaldi nagusia, 22:00etan kontzertua eskainiko baitu musikariak, duela bi urteko irekiera jaian egin bezala. Sarrerak salgai daude oraindik Faktoria.eus webgunean.
Ekitaldi guztiak irekiak izango dira, proiektua eta espazioa bezala.
