Daniel Sarduník sortu zuen Hardcore Hits Cancer (HXC) elkartea duela zenbait urte, minbizia pairatzen ari zenean musikan topatu baitzuen babeslekua. Hainbat ekimen antolatzen dituzte gaitz hori duten haur eta familiei laguntzeko, AFANOC elkartearen bidez. Gainera, COVID-19aren pandemiaren ondorioz egoera zaurgarrian zegoen jendea laguntzeko beste ekimen bat ere abiatu zuten. Elkarteko kide den Joakik antolatu zuen, eta Leganeseko Auzo Elkarteen Tokiko Federaziora bideratu zuten dirua.
Duela lau urte, Isra Fernandez laudioarrak eta Agui Malas Cartas talde katalaneko bateria-joleak Laudion musika festibal solidario bat antolatzeari ekin zioten. Horrela sortu zen Laudio Minbiziaren Kontra proiektua. Kasu honetan ere, AFANOC elkartera bideratzen dute etekin guztia.
Aurtengo edizioa irailaren 14an izango da, Sorgin tabernan, 19:30etatik aurrera, eta zazpi taldek hartuko dute parte: Doble Fuerza Gironatik datorren talde argentinarra, Grippers madrildarrak, Penadas por la Ley eta ShÖck talde bilbotarrak, Gironako Mal Asunto eta Tropical Hardcore taldeak eta Lur talde laudioarra. Aurten emakumezko ahotsei protagonismoa emateko ahalegina egin nahi izan dutela adierazi dute antolatzaileek. Halaber, egitarauarekin hasi baino lehen, Bilboko Malacopa taldearen kontzertua eta Koldo Orue DJaren sesioa entzun ahalko dira doan.
Sarrerak salgai
Dagoeneko salgai daude sarrerak, 15 euroren truke. Brixton dendan eta La Espuela tabernan eskuratu daitezke Bilbon, eta Sorgin tabernan Laudion. Gainera, kamiseta berri bat ere plazaratu dute, online eskuratu daitekeena.
