Izena duena badela dio esaera zaharrak. Baina izenik ez duena ere existitu egiten da batzuetan. Horren adibidea da Laudioko X kuadrilla. 60 urte bete berri dira talde hori eratu zenetik, eta bizirik geratzen diren kideak hori ospatzeko batu ziren ekaineko azken ostegunean. Herriko plazan geratu ziren talde argazkia egiteko, eta kalejira egin zuten jarraian txistulari eta guzti, okasiorako berariaz prestatutako pankartarekin.
1963. urtean ekin zioten kuadrilla sortzearen ideiari bueltak emateari. Oso bestelako garaiak ziren: 14-15 urte zituzten eta elizako arkupean biltzen ziren jolastu eta elkarrekin egoteko. Dozena bat kide inguru bildu ziren garai hartan. Gaur egun, 7-8 dira, gainontzekoak zendu egin direlako.
Hala azaldu dio Adolfo ‘Fito’ Guerrerok Aiaraldea Komunikabideari. Kuadrillako kideak azaldu duenez, taldeari izenik jarri gabe ospatu zituzten lehenengo sanrokeak. “Prentsan aipamena egin zitzaion gure taldeari, izenik ez zuela aipatuz”. Hurrengo urtean erabaki zuten taldeari ‘X’ deitzea, izen eza izentzat hartuz.
Kalejiretan parte hartzen zuten gehienbat. Horretarako, Javi Latorre fitxatu zuten txistulari gisa. “Gurea izan zen horrelako musikari bat zeukan lehen kuadrilla”, nabarmendu du Guerrerok.
Baina esperientziak ez zuen asko iraun. Adinez nagusi bihurtzean zerbitzu militarra egiteko unea iritsi zitzaien kuadrillako kideei, ia gehienak baitziren gizonezkoak. Etenaldi hori behin betikoa bilakatu zen, soldaduzkatik itzultzerakoan ez zutelako kuadrilla berrosatzerik izan. Hala ere, taldearen historia argitara atera zen berriz duela zenbait urte, Antzinako Kuadrillak berpiztu eta batzeko dinamika abiatu zenean.
Argazkiak: Joane Maiz Martinez
Argazki zaharrak: X kuadrilla