EUDELek eta Europako Kontseiluak Zigiluaren V. edizioa sustatu dute Euskadin. Laudiok Europako Kontseiluaren Gobernantzako Bikaintasunaren ELoGE Zigilua eskura dezake bigarrenez, 2020an lehenengo Zigilua eskuratu ondoren. Aintzatespenak uztailaren 18an jakinarazi eta emango dira, Donostian, EUDELeko elkarteburu Esther Apraiz eta Europako Kontseiluko ordezkari Daniel Popescu buru izango diren ekitaldian, zortzi euskal udaletako alkateen parte-hartzearekin batera.
2017an, EUDEL-Euskadiko Udalen Elkartea Europako Kontseiluak zigilua emateko baimendutako lehen eskualde-plataforma bihurtu zen. Aurten, ELoGEren V. edizioa egin da Euskadin. Aurreko lau urteetan, hogei bat udalerrik parte hartu izan dute eta horietatik, 12 euskal udalek jaso dute saria. ELoGE zerrenda, orain arte, Europako 21 herrialdetako 300 udalerri inguruk osatzen dute.
ELoGE lortzeko, udal hautagaiek autoebaluaziorako metodologia zorrotza erabiltzen dute, eta horrek gobernu onaren hamabi printzipioei buruzko 72 adierazle gainditzea dakar: Partaidetza demokratikoa; Giza eskubideak; Zuzenbide estatua; Etika publikoa; Kontuak ematea; Irekitasuna eta gardentasuna; Kalitatezko administrazioa, eraginkorra eta efizientea; Lidergoa, gaitasunak eta ahalmenak; Erreakzio gaitasuna; Ekonomia eta finantza kudeaketa sendoa; Jasangarritasuna eta epe luzerako ikuspegia; Aldaketara eta berrikuntzara irekitzea.
Adierazle bakoitza justifikatzeko, dokumentu-ebidentziak eman behar dira. Udal-tresnak baloratzen dira, bai barnera begirakoak (aginte-plana, finantza- plana, GJHrekin lerrokatutako aurrekontuak, erosketa publiko arduratsua eta berritzailea...), baita kanpora begirakoak ere, horiek guztiak herritarrekiko eta tokiko eragileekiko harremanetan (parte hartzeko eta gardentasunerako bideak, etika- edo jokabide-kodea, 2030 Agenda estrategia...).
Ohar bidez azaldu dutenaren arabera, EUDELentzat eta Europako Kontseiluarentzat azken helburua eta benetako saria ez da zigilua lortzea soilik, baizik eta udalak beren erakundeen etengabeko hobekuntza-prozesuan inplikatzea. Hori koordinazio politiko-teknikoaren bidez eta bere indarguneen eta garapen-eremuen diagnostikoaren bidez lortzen da. Edizio berri bakoitzean, akreditazioa berritzera udalerriak gonbidatu nahi dira, eta praktika onak identifikatzen dira hobekuntza-planak bultzatzeko.
2024ko hautagaiak
> Laudio (dagoeneko zigilu bat du)
> Irun (dagoeneko bi zigilu ditu)
> Legazpi (dagoeneko zigilu bat du)
> Ermua (dagoeneko zigilu bat du)
> Erandio (hautagai gisa errepikatzen du)
> Azkoitia (lehen aldiz aurkezten da)
> Donostia (lehen aldiz aurkezten da)
> Errenteria (lehen aldiz aurkezten da)