Laudioko kofradiak 2024ko ohorezko pitxerrak laudioar ospetsu biri emango dizkie: Ariadna Martinez eta Antonio Oyarzabali. Ariadna Martinez opera-abeslaria da eta Madrilen bizi da, Antonio Oyarzabal, berriz, pianista da, musika klasikoko hainbat disko sortu ditu eta Londresen bizi da.
Abuztuko azken igandean omenduko dituzte biak Erroke Deuna kofradiaren tradiziozko bazkaria baino lehen. Aurten, bazkaria ez da elizako arkupeetan egingo, institutuko patio estalian baizik.
Ohiko menua egongo da, ogi-zopa, garbantzuak eta haragia tomatearekin, eta postrerako udare bat. Berrikuntza bezala, kofradiakideek janaria jaso eta etxera eraman ahal izango dute.
Ardoaren fora tradizionala, elizako arkupean egin beharrean, udaletxe zaharreko sarrerako arkupean egingo da, pregoia eta gero, abuztuaren 14ean, 19:30ean. Bertan, jaietako azken igandeko bazkari historikoan hartuko den ardoa zein izango den erabakiko da.
Bestalde, abuztuaren 16an, Erroke Deuna eguneko ekitaldi instituzionala egingo da parrokian bertan, 11:00etako mezaren ondoren. Bertan, kofradiak "urrezko domina bana emango die kofradian 50 urte daramatzaten bi kofradiakideri, eta, berrikuntza gisa, bi diploma emango dizkie erakundean 75 urte baino gehiago daramatzaten kofradiakideei”. Aurten Félix Bengoa eta Juan Antonio Urquijorentzat izango dira.