Nola jaso duzue aurtengo pregoiaren ardura?
Patxi Sanchez: Ezustean, ez genuen espero. Pozgarria izan da 31 urtetan egindako lana aitortzea. Zirriborro bat prest dugu pregoiarekin.
Zein da taldearen ibilbidea?
P.S.: 1993an hasi ginen elkarte gisa. Aretako Kultura Etxean egin genituen lehen urratsak. Bospasei lagun elkartu eta irakasten eta praktikatzen hasi ginen. Berehala eman genuen festetatik irteteko pausoa.
Garai hartan instrumentua ezezaguna zen, jada ez zen hemen jotzen. Antzina Eltziegoko gaitariak etortzen ziren, baina gu hasi ginenerako ez. Horrela abiatu ginen, eta gure itxaropena da jarraituko duela.
Xabier Valle: Laudio ez da jotzen dugun leku bakarra, deitu gaituzten toki pilora joan gara. Euskal Herrian herri asko bisitatu ditugu. Batzuk urtero errepikatzen dira, eta beste batzuetan noizean behin parte hartu dugu. Gainera, ez gara beti elkarrekin joaten, Patxi batzuetan Jesusekin edo Bilboko norbaitekin joan da.
Nolanahi ere, Bizkaitik eskatu ohi dute gure presentzia, baina Gipuzkoan, Araban, Nafarroan... ere izan gara. EAEn tamaina handiko ia herri guztietan egon gara, erraldoiekin edo dantza taldeekin jotzeko.
Jesus Angel Ruiz Perez de Azpilikueta: Taldean edo banaka, ia Euskal Herri osoan jo dugu. Iparraldean ere egon gara, eta Espainiako Estatuan ere bai: Galizia, Katalunia...
Zein da zuen errepertorioa?
X.V.: Errepertorio klasikoa dantzarako eta kalerako musikak osatzen du, hau da, dianak eta kalejirak. Bada beste zati garrantzitsu bat, XIX. mendearen amaieratik datorrena: balsa, polka, mazurkak, txotisa... Errepertorio hori Nafarroako gaiteroetan geratu zen.
Gero musika modernoagoak gehitu dira, abestien melodiak, euskaldunak eta baita beste leku batzuetakoak ere, beste dantza batzuk... Corpus nagusia jota den arren, fandangoa, arin arina, makil dantza, zinta-dantzak, arku-dantzak... ere jo ditugu: Otsagabiakoa, Arabako Errioxakoa, Kuartangokoa...
Zein talderekin aritu zarete elkarlanean?
P. S.: Laudion, batez ere, bandarekin, baina baita ere Herrien Etxeekin, dantza taldeekin, trikitilariekin, erraldoiekin...
"Taldean edo banaka, ia Euskal Herri osoan jo dugu. Iparraldean ere egon gara, eta Espainiako Estatuan ere bai: Galizia, Katalunia..."
Zenbat gaitari daude Euskal Herrian?
X.V.: Orain asko daude, pila bat. Txistua nagusi izan den lekuetan ere, gaita instrumentu-kutsu bereizgarriagoa hartzen ari da. Lehen ez zegoen lekuetan ere badaude, Baztanen eta ia Nafarroa osoan, adibidez.
Araban, Gasteizen eta Arabako Errioxan daude, eta hemen gu. Bilbon, Bilbo Handiaren inguruan eta Bermeon daude. Gipuzkoan ere badira taldeak herri handietan. Denekin ez dugu harremanik, nahiz eta jende asko ezagutzen dugun.
Zerk motibatu zaituzte 31 urte hauetan?
P.S.: Instrumentuarekiko zaletasunak eta jende gehiago batzen saiatzeak.
J.A.R.P.A.: Zaletasunak, soinuak, gustatzen zaiguna eta entzuten gozatzen duguna. Hobetzen saiatzen gara.
X.V.: Errepertorioa zabaltzea, jende berria ezagutzea, laguntzea...
Zein da zuen errutina Laudioko jaietan?
P.S.: Txupinazoaren egunean hasten gara, erraldoiekin eta kuadrilla guztiekin irteten. Gero dianekin hasten gara, bermuta girotzen dugu eta erraldoiei laguntzen diegu. Arratsaldean gaua hasi arte jarraitzen dugu. Bi egunetan izan ezik, guztietan ateratzen gara.
X.V.: Lehen zezen-plazara joaten ginen, banderillak jotzeko ohitura baitzegoen. Niretzat, zorionez, ez dugu plazara joan beharrik. Horrela egiten zen Iruñean eta Bilbon, eta hemen ere bai.
Aurtengo jaiak bereziak izango dira?
P.S.: Pregoilari izango garen unetik, bereziak izango dira. Zerbait berezia egitea ere pentsatu dugu.