Nondik dator zuen kuadrillaren izena?
Ez du jatorri berezirik. Sagazti hitza gustatu zitzaigun bere momentuan, gazteleraz manzanal dena, eta gure egiteko sagazti bilakatu genuen. Hortik dator Sagaztiak kuadrilla.
Zein da jaietako egunik onena? Zergatik?
Kuadrillen Eguna, kuadrilla guztia elkarrekin bazkaldu eta egun osoa elkarrekin pasatzen dugulako, eta hori geroz eta zailagoa da urteak pasa ahala. Gainera, ekintza eta jokoz betetako eguna da baita ere.
Zergatik erabaki duzue Suziri Jai Batzordean kuadrilla moduan parte hartzea?
Badira pare bat urte kontu honi bueltak ematen hasi ginela, Laudioko jaietan gehiago murgiltzeko helburuarekin, jokoetarako ideia zoro bat edo beste planteatzeko asmoarekin edota kuadrillen bazkarietan parte hartzeko intentzioarekin ere.
Egitarauko zein ekintzetarako zaudete gogotsuen?
Ekintza aldetik, guk antolatutakorako, noski, besteoi ere gustatuko zaielakoan gaudelako eta ekintza berriak ilusio handiagoz disfrutatzen direlako. Kontzertuei dagokionez, Zetak taldea ikusteko gogoz gaude, azken urteetako nobedadea delako.
Zein uste duzue izango dela txosnetan gehien entzungo den abestia?
Eguzkiloreak, Ardi beltzak, Beste behin, Tirikitruki, Potra Salvaje eta Eguzkiaren argia aipatuko genituzke.
Zein duzue gustukoen: bafle-poteoa, batukada edo elektrotxaranga?
Batukada edo elektrotxaranga biak bikainak dira, sentsazio ikaragarria da kaleetatik kuadrilla eta herritar guztiak elkartuta dantzatzen eta abesten ikustea.
Zerk egiten ditu Laudioko jaiak berezi?
Aiaraldeko handienak direla eta, horrez gain, inguruko jende eta familia kide asko etortzen direla. Bestalde, herriaren historia dago. Euskal Herritik zein Espainiatik etorritako hainbat aitite eta amonei esker, kultur anitz batzen dira herrian eta horrek xarma berezia ematen die festei.
