Ez da bola txapelketarik egongo Laudioko jaietan. Ostiralean egingo zen San Roke bolakeku sari handia izen bereko bolatokian, Baserritar Egunaren testuinguruan. Baina urteroko proba hori bertan behera uztea erabaki du Ruperto Urquijo Bolatoki Klubak.
Taldeko kideek maiatzetik daramate Udalak urtero ematen dien diru-laguntzaren zain. “Duela hilabete bat esan ziguten dirua kontu korrontean sartuko zigutela, baina oraindik ez da iritsi”, azaldu dio Adrian Del Riok Aiaraldea Komunikabideari. Klubeko presidenteak nabarmendu du “iazko aurrekontua baliatuta” finantzatu dituztela azken bi probak. “Guk dirua aurreratu behar izatea ez da egoera aproposa”.
Horregatik erabaki dute planto egitea, eta jarrera bera hartzeko deia luzatu diete herriko beste elkarteei. Izan ere, Del Rioren hitzetan, herriko beste hanbat kultur eta kirol elkarte daude arazo berdinekin, “kuadrillei soilik” eman zaielako dagoeneko jarduerak antolatzeko dirua.
Bolatoki klubeko kideentzat ez da erabaki erraza izan plantoarena. Izan ere, Baserritar Eguneko proba txapelketa handiago baten parte da, eta ez egiteak albo-kalteak eragin ditzake gerora etorriko diren beste probetan. Gainera, bolatokiak diru-laguntza jasotzen du baita Foru Aldunditik, eta laguntza hori ere arriskuan egon daiteke, urtean txapelketa kopuru zehatz bat egitera konprometitzen duelako kluba.
Kultur eta kirol elkarteen diru-laguntzen atzerapenek soka luzea ekarri dute Laudion. Uztaileko Udal Osoko Bilkuran eztabaidatu zen gaia. Bertan, Udalak aurreratu zuen "dirulaguntzen kronograma bat" osatu nahi duela, dagoen blokeoa gainditzeko.