Nola sortu da ekimen hau?
Urtero bezala, irratian ari nintzen elkarrizketa bat erantzuten otsailaren 14a zelako, Nazioarteko Kardiopatien Eguna, alegia. Orduan Joseba Amondok deitu zuen irratira, nirekin harremanetan jartzeko interesa zuelako.
Azaldu zidan Orkatzak taldearekin elkartasun ekimena antolatu nahi zutela bihotzeko gaixotasuna dutenen alde. Nik baiezkoa eman nion Bihotzez elkartearen izenean eta horrela hasi zen dena.
Ostiral eta larunbateko jardunaldia antolatu duzue.
Ostiralean 21:00etan hasiko da ekitaldia. Orkatzak taldea aterako da Aldai plazatik Goikoganera igotzeko eta orduro talde batek egingo du gauza bera.
Norbanakoak nahi dutenean agertu eta taldeetako batera batu daitezke. Ez dago izen ematerik, ezta preziorik. Ekarpen ekonomikoa egin daiteke edo ez. Norberak erabaki dezake. Babesa soilik eman nahi badute mendira igota, ondo dago. Erronka da 8.000 metroko igoera hori betetzea.
Azken igoera 11:00etan izango da Ezina Ekinez Egina elkartearekin. Laudioko ume bat igoko da eurekin.
Larunbatean ekintzak hasiko dira goizeko bederatzietatik aurrera: baserritarren azoka, umeentzako tailerrak, elkartasun hamaiketakoa…
Laudioar Txirrindularitza Elkarteari esker, beste erronka paraleloa egongo da. Hain zuzen, Alberto Valles “Diavolok” zeregin propioa izango du, Tourmalet-era igotzea, nolabait. Sugarrakekoek ere saskibaloi partidak izango dituzte, herri bazkaria egongo da, zumba saioa arratsaldean eta, amaitzeko, erromeria.
"Unai, 8 urteko laudioarra, lehenbiziko aldiz igoko da mendi tontor batera, eta polita izango da ikustea nola atera eta itzultzen den"
Azken taldekoei harrera berezia egingo diezue, ezta?
Bai, hunkigarria izango da. Unai, 8 urteko laudioarra, lehenbiziko aldiz igoko da mendi tontor batera, eta polita izango da ikustea nola atera eta itzultzen den.
Jende oro gonbidatu nahi dugu parte hartzera. Joseba Amondo zazpi aldiz igoko da Goikoganera eta erronka hori ere polita izango da.
Nola sortu da Joseba Amondoren proba hori?
Berak ere bihotz berezia dauka eta, prest zegoenez, guk proposatu genion zazpi aldiz igotzea mendira. Lortuko duelakoan nago eta uste dut erronka garrantzitsua izango dela.
Bihotzez elkartera joango da biltzen duzuen dirua.
Bai, dena bideratuko dugu elkartera, ematen dugun babesarekin jarraitzeko. Bide batez, eskerrak eman nahi dizkiegu parte hartuko duten guztiei: Orkatzaki, Vital Fundazioari babes ekonomikoagatik...
Zertan datza zuen elkartearen jarduna?
Laguntza prestatzea da lanik handiena eta garrantzitsuena. Psikologoak ditugu ospitaletan, ikasketa neuropsikologikoak eskaintzen dizkiegu umeei, trebakuntza saioak egiten ditugu hezkuntza esparruan... baina niretzat inportanteena da umeei, gurasoei eta familiei, oro har, babesa ematea.
Lehentasuna da familia guztiek gure babesa izatea kardiopatiaren berri izatean. Izan ere, kasu gehienetan umeak ospitalera jo beharko du ebakuntza bat izateko. Beti lagunduta egon behar dira bakarrik ez sentitzeko.
Nire alabaren diagnostikoa heldu zenean, nik ez nuen ezagutzen elkartea eta bakarrik sentitu nintzen.
"Lehentasuna da familia guztiek gure babesa izatea kardiopatiaren berri izatean"
Nola bizi duzue zure alabaren kardiopatia?
Nik beti esaten dut nire alaba miraria izan dela. Berez, kardiopatia duten lagun gehien-gehienek ebakuntza behar dute. Mila kasutik bakarrak egiten du hobera ebakuntzarik gabe, eta berak egin zuen.
Horregatik, hain zuzen, hasi nintzen honi buruz informazioa bilatzen, bada ez bada, ebakuntza behar izatekotan prest egoteko. Hasieran uste nuen, nolabait, bakarrik nengoela munduan.
Zentzu horretan, Bihotzez nire familia bihurtu da, kideekin hitz egiteko aukera daukat eta, zalantzaren bat sortuz gero, eurekin argitzen dut. Hori da behar duguna.
Kardiopatia ez duen familiako kide edo lagun batekin hitz egitean, agian ez dute ulertzen gure kezka. Kardiopatia ez da ikusten kanpotik, barrun dago eta hori ez da horren erraz ulertzen.
Noiztik zara Bihotzez elkarteko kidea?
Bederatzi urte daramatzat elkartean. Nire alabak hamaika urte ditu, baina diagnostikoaren osteko lehen urtean ez nintzen gai honi buruz hitz egiteko eta ez nekien zehaztasunez kardiopatien benetako ondorioa. Nire alaba txikia nagusiagoa zenean hasi nintzen bilatzen eta topatu nuen elkartea. Psikologoarekin hitz egin eta hasieran ama moduan sartu nintzen elkartean, kide bezala.
Pixkanaka-pixkanaka ekintzetan gero eta gehiago parte hartzen hasi nintzen eta orain zuzendaritzan nabil.